1 Mndewa Mulungu yamulumbileni mweye wanhu wa Yakobo,

yeye yamtendileni mweye wanhu wa Isilaili, kolonga,

"Sekemudumbe, kwaviya niye nimkombolani,

nimtangani kwa zina jenu,

mweye wanhu wangu.

2 Muhafosa muna yamazi mengi,

nizakuwa hamwe na mweye,

muhafosa muna zinyanda hamwizakulusigwa,

iviya mwahagenda muna umoto hamwizalunguzigwa,

lambi da moto hadizamulunguzani.

3 Kwaviya niye niiyo Mndewa Mulungu,

Mulungu wenu, Mulungu Yelile wa Isilaili, mkombola wenu.

Nizailava isi ya Misili iwe fidia yenu,

nizazilava zisi za Kushi na Seba badala ya mweye.

4 Kwaviya mweye munoga ng'hani haulongozi wangu,

na kwaviya nimwing'hani ukulu na nomulondani,

ivo nizawaleka wanhu wa zisi zimwenga muladi nimpateni.

5 Sekemudumbe kwaviya niye nahamwe na mweye,

nizawabweleza wanenu kulawa ubanzi wa ulawilo wa zuwa,

nizawazahila kulawa ubanzi wa uswelo wa zuwa.

6 Nizailongela isi ya kasikazi, ‘Waleke wasegele,’

na isi ya kusi, ‘Sekeuwagomese.’

Wabwelezeni wanhu wangu kulawa kutali,

kulawa chila hanhu muna izisi zose.

7 Wabwele wanhu wangu wose,

woniwalumbile muladi wanitogoze."

8 Wagaleni kuulongozi wanhu wano,

wanhu weli na meso mbali hawalola,

weli na magutwi mbali hawahulika.

9 Zisi zose ziiting'hane hamwe,

wanhu wose waiting'hane hamwe.

Vino yelihi yodaha kuchilagusa mbuli zilawilila sambi?

Vino yelihi yodaha kuchilagusa mbuli zondazilawilile hamwande?

Wawagale wakalangama.

10 Mndewa Mulungu kolonga,

"Mweye Waisilaili wakalangama wangu,

nimsagulani muwe wasang'hani wangu,

mudahe kunimanya na kunihuwila,

niiyo niidumwe Mulungu.

Ning'hali niye hakukalile mulungu imwenga,

iviya hakwizakuwa na mulungu imwenga.

11 Niye niidumwe niiyo Mulungu,

habule mkombola imwenga.

12 Nigong'onda mbuli zondazilawile,

maabaho niza kuwalopola.

Habule mulungu imwenga yadahile kutenda ivo.

Mweye wakalangama wangu.

13 Niye niiyo Mulungu na nizakuwa Mulungu siku zose,

Habule yodaha kukwepa nguvu yangu,

habule yodaha kugalula chonitenda."

14 Mndewa Mulungu niiyo mkombola wenu,

Mulungu Yelile wa Isilaili kolonga,

"Kwa ichimu chenu nizadituma bumbila da watowang'hondo wakaitowe isi ya Babeli.

Nizazibena nyivi za bululu jake,

nyangi za kudeng'helela za wanhu wa Babeli zizagaluka matanga.

15 Niye niiyo Mndewa Mulungu, Mulungu wenu Yelile,

Niye niiyo mfalume wenu,

mulumbaji wa wanhu wa Isilaili."

16 Mndewa Mulungu katenda nzila muibahali,

hanhu ha kufosa heli na mazi mengi.

17 Kaditowa bumbila da watowang'hondo weli na nguvu,

hamwe na watowang'hondo weli na matololi ya kubululigwa na falasi,

kawagwisa sekewadahe kwinuka kaidi,

kawazima fana utambi ukwaka.

18 Yeye kolonga, "Sekemuzikumbuke mbuli zifosile,

iviya sekemuzigese mbuli za umwaka.

19 Lola nizatenda chinhu cha sambi,

chizatendeka sambi,

sambi mwizadaha kuchiwona.

Nizatenda nzila muna ichuwala,

na mazi yezalawa muna dibwilingu.

20 Wanyama wa kumbago wezanihishimu,

kwaviya nizakwika mazi muna dibwilingu,

na nizalava mazi muna ichuwala,

muladi niweng'he mazi wanhu wangu woniwasagule,

21 wanhu waja niwalumbile kwa ichimu changu,

muladi wagong'onde nhogolwa zangu.

22 "Hamunitangile, mweye wanhu wa Yakobo,

mbali munilegela, mweye wanhu wa Isilaili.

23 Hamunigalile ng'hondolo wenu wa nhambiko za kutimbula,

na hamunihishimu kwa nhambiko zenu za kutimbula.

Simuwangilizeni kulava nhambiko,

iviya simulegezeni kwa kulonda ubani.

24 Hamunigulile mavuta yonung'hila goya,

iviya hamunigutize kwa nhambiko zenu,

mbali uhasanyi wenu uwa mbahasha kumwangu,

na munilegeza kwa mbuli zenu zihile.

25 "Mbali niye nisegeza ubananzi wenu kwa ichimu changu mwenyewo,

iviya sizakumbuka uhasanyi wenu.

26 Nilongele mbuli zifosile,

leka chilonganye,

muladi upate haki yako.

27 Wasaho yenu wa mwanduso kahasanya,

walangulizi wenu wanilema.

28 Ivo nizawaguma chinyala wakulu wa nhambiko wa kaye yangu,

nizawatenda wehi wawanange Waisilaili.

Niwaleka wawalige wanhu wa welesi wa Yakobo."