1 Nizamwimbila wila mbwiyangu,

wila wa mgunda wake wa mizabibu.

Mbwiyangu kakala na mgunda wa mizabibu

uchanyha ya mulima uli na ulongo unogile.

2 Kalima vinogile na kasegeza mabwe yose,

umo kaombeka mizabibu inogile,

kazenga lingo hagati yake na katenda hanhu ha kubojogela zabibu.

Maabaho kalolela kupata zabibu zinogile,

mbali mizabibu ima zabibu zili usungu.

3 Tegelezeni mweye wanhu wa Yelusalemu na Yuda,

humizeni hagati ya niye na mgunda wangu wa mizabibu.

4 Vino nibananga choni muna umgunda wangu?

Vinilolele zime zabibu zinogile, habali zima zabibu zili usungu?

5 Lelo nizawalongela chiya chondanitende muna umgunda wa mizabibu,

nizasegeza konhi jake, nawo wizanangigwa,

nizaisung'ha wako jake, nawo wizabojogigwa.

6 Nizautenda mgunda uwe bwilingu,

mizabibu yake haizahalililigwa hebu kuhambuligwa matambi yake,

uko kwizakota mbigili na visasa.

Iviya nizayalongela mawingu sekeyatonye mvula.

7 Mgunda wa mizabibu wa Mndewa Mulungu Yeli na Udahi niiyo kaye ya Isilaili,

na wanhu wa Yuda niuwo mbiki wake wa kunogeza.

Kalolela watende voilondeka mbali wakoma wanhu,

kalolela watende mbuli zinogile mbali wawatenda wanhu walile.

8 Mwizagaya mweye mongeza kaye zimwenga muna zikaye,

na mokongeza migunda imwenga muna imigunda,

mbaka chila hanhu hokuwa henu na habule hanhu ha wamwenga muna iisi.

9 Nimuhulika Mndewa Mulungu kolonga,

"Ukweli kaye nyingi zizasigala matongo,

kaye ng'hulu na zinogile zizapuwa wanhu wa kukala.

10 Mgunda wa mizabibu wa heka longo,

wizalava lita nane muhala za divai,

munhu yohanda mbeyu chilo gana kezagobola chilo longo muhala."

11 Wezagaya waja woidawa na kung'wa upele,

waja wokala meso ichilo, mbaka wakoligwa ng'hani.

12 Wana chinubi na bango muna yamadugila yawo,

wana ngoma na vilongelonge na divai,

mbali hawagesa mbuli za Mndewa Mulungu,

na wokwehula sang'hano zake ziyasang'hane.

13 Ivo wanhu wangu wezagaligwa kuuhami,

kwaviya hawamtegeleza Mulungu.

Wakulu wawo wezadanganika na nzala,

wanhu wengi wezadanganika na ng'hilu.

14 Kuzimu kulinga fana munhu yeli na mulomo mgalamu na yeli na nzala,

kogozela wakulu wa Yelusalemu.

Umo wezahumuluka wakulu wawo na wanhu wengi,

hamwe na wanhu wowosovula na wanhu wodeng'helela.

15 Chila munhu kezagumigwa chinyala,

iviya wanhu wose weli na magoda wezagumigwa chinyala.

16 Mbali Mndewa Mulungu kezatogozigwa kwa kuwahumiza wanhu wake,

yeye kolagusa ukulu wake kwa sang'hano zake zigoloke.

17 Wanang'hondolo wezakuja mgina fana muna umgunda wa kuwadimila.

Wanaluti wezakuja mgina muna yamatongo ya matajili.

18 Wezagaya waja wobulula uhasanyi kwa nzabi za uvwizi,

wobulula wihi fana wobulula na nzabi za tololi.

19 Wezagaya waja wolonga, "Mulungu yalopole,

yatende sang'hano yake chipate kuiwona.

Mulungu Yeli Uchanyha, Yelile wa Isilaili,

yafikize lungilo jake muladi chivimanye kogesa choni."

20 Wezagaya wanhu woulonga wihi uwo unovu na unovu uwo wihi,

ziza wodilonga bung'hulo na bung'hulo wodilonga ziza,

chili usungu wochilonga chamulile na chili umulile wochilonga chausungu.

21 Wezagaya waja woigesa wabala na wavimanya.

22 Wezagaya waja woigesa magalu kwa kung'wa divai ng'hani,

na woiwona wadaha ng'hani kuhanganya ving'waji vovimtenda munhu yakoligwe.

23 Wezagaya waja womulekelela munhu yotenda mbuli zihile, muladi weng'higwe lushwa,

na waja womtagusa munhu habanange.

24 Ivo fana milambi ya moto viilunguza mbaya,

na mayani yanyalile viyotimbuka,

niivo wanhu wano vondawanangigwe,

mazizi yawo yezawola na maluwa yawo yezahembeluka uchanyha fana timbwisi.

Wezanangigwa kwaviya wayalema na kuyazeha malagilizo ya Mndewa Mulungu, Mulungu Yeli na Udahi, Yelile wa Isilaili.

25 Ivo Mndewa Mulungu kawawonela ludoko wanhu wake na kawatagusa.

Milima itingisika na mitufi ilinga nhaka muna yamakulugumbi.

Mbali Mndewa Mulungu halekile kuwawonela ludoko,

kagendelela kuwatagusa.

26 Mndewa Mulungu kowatanga wanhu wa zisi zimwenga weze kulawa kutali,

kowatowela chimbeta wanhu wolawa kuuhelelo wa isi,

nawo wolopola kwiza.

27 Hawalegela na hawaikwala,

hawakukila na hawagona.

Mikwiji yawo haitohoka,

na nzabi za vilatu vawo hazidumuka.

28 Misale yawo yokutwa ng'hani,

mhinde zawo zimala kukwegigwa,

mapaga ya falasi wawo madala fana mabwe,

ugenzi wa mataili ya matololi yobululigwa na falasi yalinga fana vulavumbi.

29 Watowang'hondo wawo wotongoloma fana simba,

wotongoloma fana wanasimba,

wagwilile mnyama na kumgala kutali,

kulibule munhu wa kuwahoka.

30 Siku zikwiza wezatongoloma kwa ichimu cha ukala uwo,

wezatongoloma fana bahali viibuma.

Munhu yahalola isi kezawona ziza na magayo,

iviya zuwa dizakikizigwa na ziza na mawingu.