1 Munhu kezalawilila muna uwelesi wa Yese,

fana sukila vidisuka muna disiki,

sukila ijo dizakwima matunda.

2 Muhe wa Mndewa Mulungu kezakala nayo,

Muhe iyo kezamwing'ha ubala,

na kezamtenda yahumize goya,

iviya kezamtenda yavimanye na yamdumbe Mndewa Mulungu.

3 Kezadeng'helela kumtegeleza Mndewa Mulungu.

Hezatagusa kwa mbuli ziyowona kwa meso yake muhala,

na hezahumiza kwa mbuli ziyohulika kwa magutwi yake muhala.

4 Mbali kezaweng'ha haki ngayengaye na kugombela haki za wanyondenyonde muna iisi.

Kezawatagusa wanhu wa isi yose kwa mbuli yake,

kwa mbuli zake kezawakoma wanhu wotenda mbuli zihile.

5 Haki izakuwa mkwiji wake wa kuvala,

uwaminika wizakuwa mkwiji muna ichigudi chake.

6 Mbwizi kezakala hamwe na mwanang'hondolo,

duma kezagona hamwe na luti,

dang'ang'a da ng'ombe na simba na ng'ombe yanenehe wezakala hamwe,

na mwana mdodo kezawadima wawo wose.

7 Ng'ombe na dubu wezakuja hamwe,

wana wawo wezagona hamwe,

na simba kezakuja mayani yanyalile fana ng'ombe lume.

8 Mwana ching'hele kezakwangala habehi na mwina wa zoka,

mwana mdodo kezakwingiza mkono wake muna umwina wa zoka.

9 Hawalumiza hebu kubananga,

uchanyha ya mulima wangu wa Sayuni,

kwaviya isi yose izamema wanhu wommanya Mndewa Mulungu,

fana mazi viyomema muna ibahali.

10 Siku ikwiza siki da Yese dizakuwa fana bendela. Dizakuwa chilaguso kwa wanhu wa zisi zose weze kumwake, na hanhu hake ha kuhumula hezahishimigwa. 11 Siku ikwiza Mndewa Mulungu kezawabweleza kaidi wanhu wake wasigale kulawa isi ya Ashulu na Misili na Pasilosi na Kushi na Elamu na Babeli na Hamasi na kulawa visiwa va bahali.

12 Kezakwinula bendela muladi kuwaduganya wanhu wa zisi zose,

kuwaduganya Waisilaili wawingigwe,

kezawaduganya wanhu wa Yuda wapwililike banzi zose za isi.

13 Wanhu wa Efulaimu hawezawawonela migongo kaidi wanhu wa Yuda,

na wanhu wa Yuda hawezawehula wanhu wa Efulaimu.

14 Wezawahulumukila muna yamakolongo ya Wafilisiti weli ubanzi wa uswelo wa zuwa,

wezailumba kuwahoka wanhu wa ubanzi wa ulawilo wa zuwa.

Wezawahuma Waedomu na Wamoabu,

iviya wezawatawala Waamoni.

15 Mndewa Mulungu kezainyaza bahali ya Shamu,

kezagala beho muladi diugole lwanda lwa Efulate,

lwanda ulo lwizaigola vizanda saba.

Ivo wanhu wezaloka kuno wavala vilatu.

16 Kwizakuwa na kulugumbi kwa ichimu cha wanhu wake wasigale wolawa Ashulu,

fana viikalile kwa Waisilaili viwalawile kuna iisi ya Misili.