1 Mndewa Mulungu kolonga,

"Weye Yelusalemu, muke mgumba,

landula dizi jako kwa kwimba,

towa lukenze, weye muke hunakweleka,

kwaviya wanago weye ulekigwe wezakuwa wengi kufosa wana wa ija yasoligwe na mulume.

2 Galamula hema jako,

tagamula mahema yako houkala mbaka yenele kutali na sekeuyakimilile.

Zigolole nzabi zake na kugangamiza vigingi vake.

3 Kwaviya kwizagalamula chila ubanzi,

welesi wako wezahazi zisi zimwenga,

mabululu yakalile matongo yezamema wanhu.

4 "Sekeudumbe kwaviya hwizagumigwa chinyala kaidi,

sekeuwe na lugano, kwaviya hwizazehigwa kaidi.

Kwizazimiza chinyala chiupatile viukalile mwali,

iviya hwizakumbuka kaidi viwehuligwe lusita viukalile mgane.

5 Kwaviya Mulumbaji wako kezakuwa mulumako,

zina jake Mndewa Mulungu Yeli na Udahi.

Mkombola wako niiyo Yelile wa Isilaili.

Yeye kotangigwa Mulungu wa isi yose.

6 Weye Yelusalemu, Mndewa Mulungu kakutanga,

fana viya muke yalekigwe na koiyalala,

fana muke yasoligwe yang'hali mwali viyokwasigwa."

Mulungu wako kolonga ivo.

7 "Nikuleka kwa lusita luguhi,

mbali nizakubweleza kwa ubazi ng'hani.

8 Kwa ludoko ng'hani nikufisa chihanga changu kwa lusita ludodo,

mbali kwaviya nokulonda kwa kufunya umoyo, nizakuwonela ubazi.

Mndewa Mulungu mkombola wako kolonga ivo.

9 "Nizatenda fana vinitendile lusita lwa Nuhu,

lusita luja niilaha kuwa sizaigubika kaidi isi yose kwa mazi.

Lelo noilaha kuwa sizakuwonela ludoko na sizakukalikila kaidi.

10 Hata milima ihatingisika na vilima vihasegezigwa,

ulondo wangu wa kufunya umoyo hawizamala,

na lagano jangu da tindiwalo hadizasegezigwa."

Mndewa Mulungu yomuwonelani ubazi kolonga ivo.

11 "Weye Yelusalemu ugazigwe,

ugaiye na upuwile munhu wa kukuguma moyo,

nizakuzenga kaidi kwa mabwe ya bei ng'hulu,

vandusilo vako vizakuwa va mabwe ya bei ng'hulu yotangigwa samawati.

12 Malingo yako nizayazenga kwa mabwe ya akiki,

nyivi zako nizazizenga kwa madini na ng'huta yako nizaizenga kwa mabwe ya bei ng'hulu.

13 Wanhu wako wezafunzigwa na niye Mndewa Mulungu,

wezakuwa na tindiwalo ng'hani.

14 Kwizagangamizigwa kwaviya kohumiza voilondeka,

hwizawoneligwa na hwizadumba chochose.

Hakwizakuwa na chinhu cha kukutenda udumbe hata chidogo.

15 Munhu yoyose yaheza kukutowa,

kezakuwa hatumigwe na niye.

Munhu yoyose yaheza kuihuma na weye, kwizamuhuma.

16 Niye iyo nimuumbile muhunzi,

yopuguta moto wa makala na kuhonda via va ng'hondo.

Iviya niye niiyo nimuumbile mdanganyi.

17 Habule chia cha ng'hondo chondaulungiligwe chondachikupate.

Munhu yahakulongeleza kwizahuma.

Haki iyo niweng'ha wasang'hani wangu.

Haki zawo izo zilawa kwa Mndewa Mulungu."

Mndewa Mulungu kolonga ivo.