1 Mndewa Mulungu kolonga,

"Niigubula kwa wanhu waja hawauza mbuli zangu.

Niwoneka kwa wanhu hawanizahile.

Kwa wanhu hawanipulile niwataze,

nilonga, ‘Nabahano.’

2 Imisi yose nigolosa makono kuwataza wanhu wonilema,

kwaviya wanhu wawo wotenda mbuli zihile,

na wosondelela magesa yawo wenyewo.

3 Wanhu wawo lusita lwose wonisovula kuno nolola,

kuno woilavila nhambiko milungu yawo,

na woifukizila ubani uchanyha ya chila lupango lwa matafali.

4 Wokala muna yamaleme na ichilo wogona hanhu hawo haholile ha kutambikila.

Woja nyama ya nguluwe na waguma msuzi wa wanyama wambule mwiko muna ivyano vawo.

5 Wanhu wolonga, ‘Kala kutali sekeunikwenhukile,

kwaviya niye nyela ng'hani!’

Wanhu fana wawo walinga fana yosi vidingila muna zimhula zangu,

yosi ijo dolawa muna umoto ugendelela kwaka."

6 Mndewa Mulungu kolonga,

"Muvimanye kuwa mbuli izo zandikigwa haulongozi wangu,

sizanyamala, mbali nizawaliha yombe jawo,

nizawaliha yombe jawo voilondeka.

7 Nizawaliha kwa ichimu cha uhasanyi wenu na uhasanyi wa tati zenu.

Walava nhambiko za kutimbula kuna umulima,

wanisovula uchanyha ya vilima,

ivo nizawalingila muna zimhambaga zawo maliho yolondeka kwa nhendelo zawo za umwaka."

8 Mndewa Mulungu kolonga,

"Fana viya divai ya sambi ing'hali yopatika muna ichipambo cha zabibu,

wanhu wolonga, ‘Sekeuchibanange,

kwaviya ing'hali na chinhu chinogile mgati.’

Ivo niivo vondaniwatendele wasang'hani wangu, muladi sekeniwanange.

9 Nizamtenda Yakobo yawe na welesi wengi,

iviya nizamtenda Yuda yawe na welesi wondawahazi isi yangu,

na wasang'hani wangu wezakala uko.

10 Bawe da Shaloni dizakuwa hanhu ha kudimila wanyama,

iviya bawe da Akoli dizakuwa hanhu ha kuhumula ng'ombe,

kwa ichimu cha wanhu wonizahila.

11 "Mbali nizatenda choni na mweye munileka niye Mndewa Mulungu,

hamugesa Sayuni mulima wangu welile,

mweye momtambikila mulungu yotangigwa ‘Sudi,’

na momulavila nhosa ya divai mulungu yotangigwa ‘Dondokela.’

12 Nizamulungilani ifa kwa zele, mose mwizachinjigwa.

Kwaviya vinimtangileni hamunidike na vinilongile hamunitegeleze.

Mutenda mbuli zihile haulongozi wangu,

musagula kutenda mbuli sizilonda."

13 Lelo niye Mndewa Mulungu nolonga,

"Wasang'hani wangu wezakuja,

mbali mweye mwizawona nzala.

Wasang'hani wangu wezakung'wa,

mbali mweye mwizakuwa na ng'hilu.

Wasang'hani wangu wezadeng'helela,

mbali mweye mwizakugwa chinyala.

14 Wasang'hani wangu wezakwimba kwa kudeng'helela,

mbali mweye mwizalila kwa usungu,

na mwizaguta ng'hondo kwa usungu ng'hani.

15 Waja woniwasagule nizaweng'ha zina da sambi,

mbali wezadisang'hanila zina jenu kuduwila.

Wezalonga, ‘Mndewa Mulungu yamkomeni.’

16 Munhu yoyose yopula kutemeligwa mate muna iisi,

kezapula kutemeligwa mate na Mulungu wa kweli.

Munhu yoyose yoilaha muna iisi,

kezailaha kwa Mulungu wa kweli.

Kwaviya magayo ya umwaka yafosa,

yaga ng'hani haulongozi wangu."

17 "Lola, nolumba ulanga wa sambi na isi ya sambi.

Mbuli zifosile hazizakumbukigwa kaidi.

18 Deng'heleleni na musekelele siku zose,

kwa ichimu cha vinhu vinilumba.

Nizaditenda bululu da Yelusalemu kuwa bululu da kusekelela,

na wanhu wake wezadeng'helela.

19 Niye nizadideng'helela bululu da Yelusalemu,

nizawadeng'helela wanhu wangu.

Dizi da ndilo hadizahulikika kaidi,

na masozi ya manhesa hayezakuwa uko.

20 Hakwizakuwa kaidi na ndilo za wana ving'hele,

walala hawezadanganika lung'hali lusita lwawo halunafika.

Munhu wa miyaka gana yahadanganika,

kadanganika yang'hali mbwanga,

yahadanganika hanafika miyaka gana,

kopetigwa kuwa kaduwiligwa.

21 Nawo wezazenga kaye na kukala umo,

wezalima mizabibu na kuja matunda yake.

22 Hawezazenga kaye za kukala wanhu wamwenga,

iviya hawezalima ndiya ya kuja wanhu wamwenga,

kwaviya wanhu wangu wezakala lusita lutali fana mibiki,

wanhu wangu woniwasagule wezadeng'helela vinhu vondawapate kwa sang'hano zawo.

23 Hawezasang'hana bila kupata chinhu,

na wanawo hawezapata mahulo.

Kwaviya wezatemeligwa mate hamwe na welesi wawo.

24 Wang'hali hawananitanga, niye nizawedika,

wang'hali hawanakomeleza kulonga, niye nizawahulika.

25 Mbwizi na ng'hondolo wezakuja hamwe,

simba wezakuja mgina fana ng'ombe,

iviya nyoka wezakuja timbwisi.

Muna umulima wangu welile,

habule yondayalumize hebu kunanga chinhu.

Niye Mndewa Mulungu nolonga ivo."