1 Ulotezi usonhela bululu da Damasiki,

"Damasiki hadizakuwa bululu kaidi,

mbali dizakuwa tongo.

2 Mabululu ya Aloeli yezasigala matongo,

yezakuwa ukazi wa mabumbila ya wanyama,

habule yondayawadumbize.

3 Mhongono za mabululu ya Isilaili zizatuligwa na utawala wa Damasiki wizamala.

Washami wondawasigale wagima,

wezakuwa wadodo fana Waisilaili.

Niye Mndewa Mulungu Nili na Udahi nilonga ivo.

4 "Siku zikwiza ukulu wa Waisilaili wizahunguka,

na utajili wawo wizakwaga.

5 Isilaili izakuwa yabule chinhu,

fana mgunda viuwa bila chinhu uhagoboligwa.

Kweli izakuwa fana kolongo da Lefaimu,

lusita wanhu wahakomeleza kugobola.

6 Wezasigala wadodo fana viya mzaituni viusigaza matunda madodo uhamala kuhutigwa,

zaituni mbili hebu nhatu muna ditambi da uchanyha,

zaituni nne hebu tano muna yamatambi ya mbiki ukwima ng'hani.

Niye Mndewa Mulungu, Mulungu wa Isilaili nilonga ivo."

7 Siku zikwiza wanhu wezamulola mulumbaji wawo,

iviya wezamuhuwila Mulungu Yelile wa Isilaili.

8 Hawezahuwila kaidi chila lupango luwatendile,

hawezahuwila chinhu chochose chiwasang'hane,

wezazizeha nyang'hiti za mulungu Ashela ziwatendile na chila lupango lwawo lwa kufukizila ubani.

9 Siku zikwiza mabululu yawo yeli na mhongono yowayahamile kwa ichimu cha kuwingigwa na Waisilaili, yezakuwa fana chuwala. Mabululu yose yezakuwa matongo.

10 Kwaviya mweye Waisilaili mumzimiza Mulungu yamulopoleni,

hamumkumbuke luwe lwenu lwa kukimbilila.

Ivo hata muhahanda mimea inogile na mizabibu imusang'hanila kuitambikila milungu imwenga,

11 hata muhaitenda ikule siku iyo iyo imuihandile,

na kuitenda yalike imitondo iyo iyo,

mavuno yenu hayezafaya muna zisiku izo za usungu na mawine.

12 Tegeleza sindo za watowang'hondo wa zisi zimwenga,

wotongoloma fana bahali.

Tegeleza mbumo wa wanhu wa zisi,

wokuluma fana mazi mengi.

13 Wanhu wa zisi wobuma fana mazi mengi,

mbali Mulungu kezawabwakila, nawo wezakimbila kutali.

Wezawingigwa fana makang'ha viyohembelusigwa uchanyha ya mulima,

fana yani vidihembelusigwa na vulavumbi.

14 Ichigulogulo wehi wochitowa na chodumba ng'hani,

mbali imitondo wokwaga.

Mbali wanhu wochihoka wezawingigwa.

Chila munhu yogeza kusola vinhu vetu kezapotwa.