1 Mulungu kolonga, "Mweye wakaya wa visiwa nyamaleni.

Mweye wanhu wa zisi zimwenga muwe magalu,

mulawe na mulonge.

Mwize chihite hamwe kuhumizigwa.

2 "Vino yelihi yamtangile mfalume yolawa ubanzi wa ulawilo wa zuwa,

munhu yohuma hanhu hohose hoyohita? Iyo niye Mulungu.

Niye noweka wanhu wa zisi zimwenga muna yamakono yake,

nayo kowahonda wafalume hasi ya magulu yake.

Kezawananga kwa mwele wake wawe fana timbwisi,

kezawananga kwa mhinde yake na wohembelusigwa fana makang'ha.

3 Kowawinga na kufosa vinogile,

kokimbila ng'hani.

4 Vino yelihi yatendile mbuli izo zose?

Vino yelihi yapangile lusita lwa chila mbuli?

Niye niiyo Mndewa Mulungu, nabahano kwandusila umwaka,

na nizakuwa baha siku zose.

5 Wanhu wokala kutali wawona mbuli zonitendile na wadumba,

isi yose igudemeka kwa kudumba,

wanhu wose weza kuiduganya hamwe.

6 Chila munhu yamtaze miyage,

kwa kumulongela, ‘Igangamize!’

7 Fundi chuma komtaza muhunzi wa zahabu.

Munhu yohonda nyang'hiti za milungu kwa nyundo,

komtaza yogongoma misumali,

komulongela yosomelela, ‘Sang'hano inoga.’

Maabaho koifunga nyang'hiti na misumali sekeihagaye.

8 "Tegelezeni mweye welesi wa Isilaili wasang'hani wangu,

mweye welesi wa Yakobo woniwasagule,

mweye welesi wa Bulahimu mbwiyangu.

9 Mweye niwalavile kulawa kuuhelelo wa isi,

nimtangani kulawa kutali kuna zimhaka za isi,

niwalongela, ‘Mweye wasang'hani wangu’,

nimsagulani na simwasileni.

10 Mweye sekemudumbe,

kwaviya niye nahamwe na mweye.

Sekemufe moyo kwaviya niye niiyo Mulungu wenu,

Nizamgumani nguvu na nizamtazani,

nizamwamhani kwa mkono wa wangu wa kulume uli wa haki.

11 "Kweli wanhu wose wawawonele ludoko,

wezapata chinyala na kuhumigwa,

wanhu wose woitowa na mweye,

wezakwaga na kunangigwa.

12 Mwizawazahila wehi wenu woitowa na mweye,

mbali hamwizawapata,

waja woitowa ng'hondo na mweye wezanangigwa.

13 Niye Mndewa Mulungu, Mulungu wenu,

nimtendani mugangamale.

Nimulongelani, ‘Sekemudumbe, nizamtazani.’

14 Mweye wanhu wa Yakobo mwili nyondenyonde fana wang'onyo,

mweye Waisilaili sekemudumbe.

Kwaviya nizawataza," Mndewa Mulungu kolonga ivo.

Yeye niiyo mulopozi wenu na Mulungu Yelile wa Isilaili.

15 "Nizamtendani muwe fana chia cha kuhunila,

chili na meno ya sambi na yokutwa.

Mwizahuna milima na kuihondahonda,

mwizavidundadunda vilima kuwa fana makang'ha.

16 Mwizaibeta milima iyo,

na beho dizaihembelusila kutali.

Mweye mwizasekelela kwa ichimu changu niye Mndewa Mulungu,

mwizanitogoza niye Mulungu Yelile wa Isilaili.

17 "Ngayengaye na wanhu wolonda kutazigwa, wozahila mazi mbali hawayapata,

malakali yawo yonyala kwa ng'hilu.

Mbali niye Mndewa Mulungu nizawedika,

niye Mulungu wa Isilaili sizawaleka.

18 Nizagubula vizanda va mazi kuna ivilima,

na nzasa hagati ya makolongo.

Nizagalusa chuwala kuwa lamba da mazi,

na hanhu baho hanyalile kuwa nzasa za mazi.

19 Nizahanda mibiki kuna ichuwala.

Nizahanda mibiki ya mielezi na mibiki ya mikakaya na mibiki ya mijoholo na mibiki ya mizaituni,

nizaika uko kwiichuwala mibiki ya mibeloshi na mivinje na misonobali,

20 muladi wanhu wawone na wavimanye kuwa,

niye Mndewa Mulungu nitenda mbuli izo,

niye Mulungu Yelile wa Isilaili niiyo nilumbile."

21 Mndewa Mulungu, mfalume wa Isilaili kolonga,

"Galeni mbuli zenu kumwangu na mwize mwiigombele.

22 Galeni nyang'hiti za milungu yenu ichilongele choni chondachilawilile.

Ichilongele mbuli za umwaka zikala vilihi,

muladi chidahe kuyagelegeza na kumanya chondachilawilile kuuhelelo.

Hebu ichigong'ondele mbuli zondazize.

23 Mweye milungu chilongeleni chondachilawilile hamwande,

muladi chidahe kuvimanya kuwa mweye mwa milungu.

Tendeni mbuli yoyose inogile hebu ihile,

muladi chipate kudumbizwa na kwazanywa.

24 Mweye si chinhu mbee,

hamudaha kutenda mbuli yoyose.

Munhu yosagula kumtambikilani mweye kotibusa.

25 "Nimsongeza munhu wa ubanzi wa ulawilo wa zuwa yodihishimu zina jangu,

nayo keza kulawa ubanzi wa kasikazi.

Yeye kezawabojoga wafalume fana nhope,

fana viya munhu viyobojoga ulongo.

26 Vino milungu ilihi ipetile mbuli ino kwandusila mwanduso,

muladi chivimanye kuwa mbuli ino ya kweli?

Habule yalongile mbuli ino na habule munhu yahulike mbuli ino kulawa kumwenu.

27 Niye nikala wa mwanduso kudilongela bululu da Sayuni,

‘Lola wabaha!’

Nimtumila msenga wa mbuli inogile muna dibululu da Yelusalemu.

28 Nilola vinogile ng'hani,

mbali simuwone mulungu yoyose,

habule mulungu muna imilungu iyo yodaha kunidika.

29 Lola milungu iyo yose ya uvwizi, haidaha kutenda mbuli yoyose,

nyang'hiti zawo hazifaya chinhu mbee."