1 Weye bululu da Yelusalemu, ima umwemwese,

kwaviya bung'hulo dolawa kwa ichimu chako,

ukulu wa Mndewa Mulungu uwoneka kumwako.

2 Ziza dogubika isi,

ziza totolo dogubika makabila yose,

mbali Mndewa Mulungu kakwizila weye,

bung'hulo jake diwoneka kumwako.

3 Wanhu wa zisi zose wezakwiza kuna dibung'hulo jako,

na wafalume wezakwegigwa kwaviya viubung'hula.

4 Inula meso yako ulole banzi zose,

wose woiting'hana na wokwizila weye,

wanago wa chilume wezafika kulawa kutali,

iviya wanago wa chike wezapapigwa.

5 Baho kwizawona mbuli iyo na kwizadeng'helela,

kwizakwazanywa na kudeng'helela,

vinhu vose vifosezigwa muna ibahali vizakwizila,

utajili wa zisi zose wizagaligwa kumwako.

6 Wachuuzi na ngamia wopapa vinhu vawo, wezamema muna iisi yako,

ngamia wolawa isi ya Midiani na isi ya Efa,

wawo wose wezakwizila kulawa isi ya Sheba.

Wezakugalila zahabu na ubani,

kuno wozigong'onda nhogolwa za Mndewa Mulungu.

7 Mabumbila yose ya ng'hondolo yolawa Kedali yezaiduganya kumwako,

mabebelu ya ng'hondolo ya Nebayosi yezalavigwa kuwa nhambiko,

yezatogoleka kuwa nhambiko muna ulupango lwangu,

niye nizaitenda kaye yangu ihishimigwe.

8 Welihi wawo wofosa himahima fana mawingu,

fana nziwa viwozumha muladi kwingila muna ivisanza vawo?

9 Kweli wanhu wa visiwa wonilolela,

ngalawa za Talishishi zokwandusa kulongolela,

zowagala wanago hamwe na hela zawo na zahabu zawo,

kwa nhogolwa ya Mndewa Mulungu, Mulungu wako,

kwa ichimu cha Yelile wa Isilaili,

kwaviya kakutenda uhishimigwe.

10 Nyambenyambe wezazizenga kaidi ng'huta zako,

wafalume wawo wezakusang'hanila.

Vinikalile na ludoko nikutowa,

mbali sambi nokuwonela ubazi kwaviya nokulonda.

11 Nyivi zako zizavuguliwa siku zose,

hazizahindigwa ichilo na imisi,

muladi wanhu wadahe kukugalila utajili wa zisi zimwenga,

kuno wafalume wawo wowalongoza.

12 Kwaviya isi na ufalume uja haukusang'hanila wizanangigwa,

zisi izo zose zizanangigwa ng'hani.

13 Nhogolwa ya mbago ya Lebanoni izakwizila,

misonobali na mivinje hamwe na misoga,

muladi kuhahamba hanhu hangu helile,

na niye nizahanogeza hanhu baho hondanikale.

14 Welesi waja wakubamanye wezakwiza kumwako na kukutumbalila mavindi.

Wanhu wose wokuzeha, wezakutumbalila mavindi mbaka vihanga vawo vidalise hasi,

na wezakutanga Bululu da Mndewa Mulungu,

Yelusalemu bululu da hoyokala Yelile wa Isilaili.

15 Weye kulekigwa na kwehuligwa,

habule munhu yalondile kufosa kumwako.

Mbali sambi nizakutenda uhishimigwe siku zose.

Kwizakuwa bululu da kudeng'heleligwa na nyelesi zose.

16 Kwizagaliligwa ndiya na wanhu wa zisi zimwenga,

wafalume wezakwing'ha ndiya inogile.

Baho kwizavimanya kuwa niye Mndewa Mulungu niiyo mulopozi wako,

niye Nili na Udahi, Mulungu wa Isilaili, niiyo mkombola wako.

17 Badala ya shaba nizagala zahabu,

badala ya chuma nizagala hela,

badala ya biki nizagala shaba,

badala ya mabwe nizagala chuma.

Nizawatenda walangulizi wako watawale kwa tindiwalo na haki.

18 Udugi hawizahulikika kaidi muna iisi yako,

ubananzi na kudanganiza havizalawilila muna iisi yako.

Nizakukaliza na kukugombela fana viya ng'huta,

wanhu wose wofosela nyivi zako wezanitogoza.

19 Imisi zuwa hadizakuwa bung'hulo jako kaidi,

iviya ichilo mwezi hawizakubung'hulila,

kwaviya niye Mndewa Mulungu niijo bung'hulo da kumwemwesa siku zose,

niye Mulungu wako nizakuwa ukulu wako.

20 Zuwa hadizahonga kaidi,

iviya mwezi hawizabwela kaidi.

Niye Mndewa Mulungu nizakuwa bung'hulo jako siku zose,

na siku zako zose za ndilo zizamala.

21 Baho wanhu wako wose wezakuwa wanoga haulongozi wangu,

wawo wezaihazi isi na izakuwa yawo siku zose.

Wawo niijo sukila donihandile,

sang'hano ya makono yangu,

muladi kulagusa ukulu wangu.

22 Munhu yeli na wana wadodo kezakuwa na lukolo lukulu,

munhu yeli mdodo kufosa wose kezakuwa isi ng'hulu.

Niye niiyo Mndewa Mulungu,

lusita lwahafika nizazikong'hela mbuli izo himahima.