1 Mkumbuke yakulumbile ung'hali mbwanga,

zing'hali hazinakwiza siku zihile,

hebu hainafika miyaka yondaulonge,

"Niye sideng'helela miyaka iyo,"

2 ving'hali zuwa na bung'hulo na mwezi na nhondo havinagumigwa ziza,

lusita mvula viyokika.

3 Siku iyo makono yokukaliza yezagudemeka,

migulu yako itogile izagedageda,

iviya meno yako yezawola na meso yako hayezalola.

4 Siku iyo nyangi hazizahulikika muna zinzila,

iviya sindo za kudundila hazizahulikika,

wanhu wezalamsigwa na ndege viwolila,

mbali madizi ya nyila hayezahulikika.

5 Siku iyo kwizadumba kukwela uchanyha na kugenda muna dikulugumbi,

mibiki itangigwa milozi vondayalike,

mbalangulu wezakwiguta.

Wanhu hawezakuwa na hamu kaidi,

kwaviya wolondeka kuhita kuzimu,

wanhu weli na ndilo wezafosa muna dikulugumbi.

6 Mkufu wa hela wizakanhika na hamha ditendigwe na zahabu dizabeneka.

Nongo ya mazi izatulika muna disima na doo da kudehela mazi dizabeneka.

7 Matimbwisi yezabwela muna iisi kaidi,

iviya muhe wizambwelela Mulungu yoyaulumbile.

8 Mpetaji kolonga kuwa mbuli zose zokwazaganya, mbuli zose zokwazaganya ng'hani.

9 Mpetaji kakala na ubala iviya kawafundiza wanhu muladi wavimanye. Kasoma na kaduganya masimwe mengi na kayandika kwa udahi. 10 Mpetaji kaiyoha kupata mbuli za kunogeza na kandika vinogile ng'hani mbuli za ukweli.

11 Mbuli za wanhu wabala zilinga fana balati da kudimila ng'ombe na masimwe yakunzagizwa na mdimi imwe ni fana miwa ikigwa goya.

12 Kufosa mbuli izo, mwanangu wiikalize. Kwandika vitabu kwabule uhelelo na kusoma ng'hani koulegeza lukuli.

13 Zihamala mbuli izo zose zilongigwe, kuna mbuli yolondigwa kulongigwa, muhuwile Mulungu na uzindilile ndagilizi zake kwaviya icho ichimu cha kulumbigwa wanhu. 14 Kwaviya Mulungu kezachihumiza kwa vinhu vose vochitendile, mbaka vochitendile kwa kwiifisa, vinogile hebu vihile.