1 Niwona mbuli ihile imwe hano hana iisi, iyo iwadidimiza wanhu. 2 Mulungu komwing'ha munhu utajili na hishima muladi sekeyapuwe chinhu chochose choyolonda. Mbali hamuleka yavideng'helele vinhu ivo kuno munhu imwenga komweda vinhu ivo. Mbuli izo zokwazaganya na ziha ng'hani.

3 Munhu yahadaha kweleka wana gana na yahakala siku nyingi, mbali hadeng'helela ugima wake na hawandigwa kwa hishima, lelo nolonga muhavu mwana yavumbuke kadanganika kufosa munhu iyo. 4 Mwana iyo yadanganike hapata chochose kwa kwelekigwa kwake, iviya kokwagila muna diziza na kozimizigwa. 5 Hawonile zuwa na hamanyile chinhu chochose, mwana iyo kohumula kufosa munhu iyo. 6 Ingawa munhu iyo kezakala miyaka elufu mbili, hadeng'helela ugima wake, lelo kalinga fana mwana iyo. Wose waidi wohita kumwe.

7 Wanhu wosang'hana usang'hano muladi kupata ndiya, mbali chila siku wowona nzala. 8 Vino wanhu wabala wana muhavu ng'hani kufosa wabozi? Vino kuvimanya kukala goya komtazaze ngayengaye? 9 Muhavu kudeng'helela vinhu vochilinavo kufosa kulonda vinhu hachinavipata. Mbuli iyo yokwazaganya na ilinga fana kugwila mbeho.

10 Chila mbuli ilawilila sambi ipangigwa na Mulungu na chila mbuli imulawilila munhu imanyika mwaka. Wanhu hawadaha kuihuma na Mulungu, kwaviya Mulungu kana nguvu kufosa wanhu. 11 Kulonga mbuli nyingi hakufaya na hakuwataza wanhu.

12 Vino yelihi yovimanya mbuli zimfaya munhu muna zisiku ndodo za ugima wake woufosa fana sisila? Vino yelihi yovimanya mbuli zondazilawilile muna iisi yahamala kudanganika?