1 Zino mbuli za mpetaji mwanage Daudi yakalile mfalume uko Yelusalemu.

2 Mpetaji kolonga, "Mbuli zose zokwazaganya,

mbuli zose zokwazaganya ng'hani!"

3 Vino wanhu wezamweda choni kwa sang'hano ziwosang'hana muna iisi?

4 Wanhu wamwenga wodanganika na wanhu wamwenga wovumbuka,

mbali isi yosigala siku zose.

5 Zuwa dolawa na doswa,

dolopola kulawa kaidi.

6 Beho dobuma kulawa ubanzi wa kusi,

dozunguluka kuhita ubanzi wa kasikazi.

Beho dogendelela kuzunguluka.

7 Mazi ya nyanda zose yokilimila muna ibahali,

mbali bahali haifakuka.

Hanhu zinyanda hozandusila,

niuko mazi koyobwela kaidi.

8 Mbuli zose zolegeza,

hazidahika kusimulila.

Meso ya wanhu hayeguta kulola,

na magutwi hayeguta kuhulika.

9 Vinhu vikalile uko niivo vondavilawilile kaidi.

Mbuli zitendeke niizo zondazitendeke kaidi.

Habule mbuli yondaiwe ngeni muna iisi.

10 Wanhu wolonga, "Lola mbuli ngeni."

Mbali itendeka umwaka ng'hani.

11 Wanhu hawakumbuka mbuli za umwaka,

na wanhu wa hamwande hawezakumbuka mbuli za sambi.

12 Niye mpetaji vinikalile mfalume wa Isilaili uko Yelusalemu, 13 niiyoha kupelemba na kuzahila kwa ubala chila chinhu chilawilile muna iisi. Niwona Mulungu viyawagazile wanhu ng'hani. 14 Niziwona mbuli zose zitendigwa muna iisi. Mbuli zose zokwazaganya na zilinga fana munhu yoilunga kugwila mbeho. 15 Wanhu wolonga, "Chinhu chikong'honyale hachidaha kugolosigwa, chilihabule hachidaha kupetigwa." 16 Nigesa, "Niipatila ubala mkulu ng'hani kufosa wanhu wose wanilongolele kutawala Yelusalemu. Nipata kuzowela na ubala na umanyi."

17 Baho niiyoha kuvimanya ubala na ubozi, mbali niwona mbuli ino iviya ilinga fana kugwila mbeho. 18 Lekamana wanhu wolonga, "Ubala wogala giyogiyo, na munhu yokongeza umanyi ng'hani kokongeza lugano."