1 Chila mbuli ina lusita lwake,

chila mbuli muna iisi ina siku yake,

2 lusita lwa kuvumbuka na lusita lwa kudanganika,

lusita lwa kuhanda na lusita lwa kugobola,

3 lusita lwa kukoma na lusita lwa kuhonya,

lusita lwa kubomola na lusita lwa kuzenga,

4 lusita lwa kulila na lusita lwa kuseka,

lusita lwa usungu na lusita lwa kuvina,

5 lusita lwa kupwililisa mabwe na lusita lwa kukunzagiza mabwe,

lusita lwa kuhagatila na lusita lwa kuleka kuhagatila,

6 lusita lwa kuzahila chinhu na lusita lwa kuleka kuzahila chinhu,

lusita lwa kwika chinhu na lusita lwa kwasa chinhu,

7 lusita lwa kudega na lusita lwa kusona,

lusita lwa kunyamala na lusita lwa kulonga,

8 lusita lwa kulonda na lusita lwa kwihila,

lusita lwa ng'hondo na lusita lwa tindiwalo.

9 Vino sang'hano ya wanhu yowafaya choni? 10 Niye niwona sang'hano ziya zoweng'higwe wanhu na Mulungu. 11 Mulungu kachitenda chila chinhu chinoge kwa lusita lwake, iviya kaweng'ha wanhu hamu ya kuvimanya mbuli zose zikwiza, mbali wanhu hawadaha kuvimanya mwanduso na uhelelo wa sang'hano za Mulungu. 12 Nivimanya kuwa kwa wanhu kuna mbuli imwe muhala ifaya, kudeng'helela na kusangalala lusita lwa ugima wawo. 13 Wanhu wose waje na wang'we na wadeng'helele sang'hano zawo. Mbuli izo ni gweko dilawa kwa Mulungu. 14 Novimanya kuwa chochose choyotenda Mulungu chizakala siku zose na habule munhu yodaha kongeza hebu kuhunguza. Mulungu kotenda ivo muladi wanhu wamdumbe yeye. 15 Chinhu chili muna iisi chikala uko umwaka na chondachilawilile hamwande chikala uko umwaka na Mulungu kochitenda chinhu icho chibwelele kulawilila.

16 Iviya niwona chinhu chimwenga muna iisi kuwa, hanhu ha kuhumizila wabaho wihi, na hanhu ha kuhumizila voilondeka wabaho wihi. 17 Maabaho nigesa, "Mulungu kezahumiza wanhu wose wotenda mbuli zinogile na wotenda mbuli zihile." Kwaviya kwizakuwa na lusita lwa chila mbuli na lusita lwa kuhumiza chila sang'hano.

18 Iviya nigesa, "Mulungu kowageza wanhu muladi waiwone wawo walinga fana wanyama. 19 Uhelelo wa wanhu na uhelelo wa wanyama umwe, viya viwofa wanhu ivo viwofa wanyama. Wose wana mhumuzi. Wanhu na wanyama wose wezakufa, wose walinga fana yosi dikwaga. 20 Wose wohita hanhu hamwe. Wose wolawa muulongo na wobwela kaidi muulongo. 21 Vino yelihi yovimanya muhe wa munhu wohita kuchanyha na muhe wa mnyama wohumuluka hasi?"

22 Ivo niwona kuwa habule chinhu chinogile ng'hani kwa wanhu kufosa kudeng'helela sang'hano zawo kwaviya walungiligwa ivo. Vino yelihi yodaha kuwalongela wanhu mbuli zondazilawilile baho vondawadanganike?