1 Fana viya ng'honzi wafile viwolava vundo muna yamavuta yonung'hila goya ng'hani,

niivo ubozi chidogo viwagiza ubala na hishima.

2 Moyo wa munhu mbala womulanguliza kutenda mbuli zigoloke,

mbali moyo wa munhu mbozi womwagiza.

3 Muna uugima wake, ubozi wake wowoneka,

wanhu wose wovimanya yeye mbozi.

4 One mtawala yahakukalikila, sekeuleke usang'hano,

moyo wako wa uhole wodaha kumbembeleza.

5 Niwona mbuli ihile imwenga hano hana iisi, mbuli iyo yogaligwa na watawala. 6 Wabozi wokwing'higwa sang'hano za hishima na matajili wokwing'higwa sang'hano za chakachaka. 7 Iviya niwona watumwa wokwela falasi na lusita ulwo watawala wogenda na magulu fana watumwa.

8 Munhu yohimba kombo kodumbukila umo,

munhu yogwisa ng'huta kolumigwa na zoka diifisile umo.

9 Munhu yosongola mabwe kolumizigwa nayo,

na munhu yotula ngodi kezapata setani.

10 Nguvu nyingi zolondeka kwa munhu yosang'hanila nhemo haitwa,

mbali yahawa na ubala kovimanya yatende choni.

11 Zoka da muhawi dahaluma ding'hali hadinatumigwa,

muhawi iyo hafaya.

12 Mbuli za munhu mbala zomtenda yalondigwe,

mbali mbuli za mbozi zomnanga.

13 Mbuli zose ziyolonga mbozi hazifaya.

14 Munhu mbozi kolonga mbuli nyingi.

Mbali habule munhu yovimanya mbuli yondailawilile hamwande.

Vino yelihi yodaha kumulongela mbuli iyo?

15 Sang'hano ya mbozi yomulegeza mwenyewo,

ivo hakumanya koyohita.

16 Kwizagaya weye isi, mfalume wako yahawa mbwanga,

na walangulizi wako wahatenda dugila imitondo.

17 Kumweda weye isi, mfalume wako yahawa munhu wa hishima,

na walangulizi wako wahatenda dugila lusita lufaya,

muladi wapate nguvu na sekewakoligwe na upele.

18 One munhu yahawa mbwa, kaye yake yoseguka na yosulula.

19 Ndiya yomtenda munhu yadeng'helele,

divai yomsangalaza,

na hela yomtenda yapate vinhu vose.

20 Sekeugese kumduwila mfalume muna umoyo wako,

iviya sekeumulige tajili muna umoyo wako uhawa wiidumwe muna ichiheleto chako,

kwaviya chidege chizahulika chiulonga,

na chizamulongela mfalume.