1 Uhengila muna ikaye ya Mulungu uiteganye. Kukwenhuka habehi kutegeleza kunoga kufosa kulava nhambiko fana wabozi weli hawavimanyile kuwa wotenda mbuli zihile.

2 Zigese mbuli ung'hali hunazilonga na sekeulopole kulonga mbuli yoyose haulongozi wa Mulungu, kwaviya yeye kakuulanga na weye kwamuna iisi, lelo mbuli zako zolondeka kuwa ndodo. 3 Uhawa na manyulunyulu ng'hani kwizalota nzozi nyingi, uhalonga mbuli nyingi kwizalonga kwa ubozi.

4 Uhamulaganila mbuli Mulungu kwa kuilaha, sekeukalame kuitenda, kwaviya Mulungu hanogelwa na wabozi. Tenda mbuli youilahile. 5 One hudaha kufikiza mbuli youilahile kutenda, kolondeka sekeuilahe. 6 Sekeuleke mulomo wako ukutende uhasanye. Maabaho sekeuigombele haulongozi wa msenga wa Mulungu kwa kulonga, "Nibananga kumulahila Mulungu." Vino habali Mulungu yakuwonele ludoko na kuzibananga sang'hano ziutenda?

7 Kulota nzozi nyingi na kulonga mbuli nyingi hakufaya, ivo umdumbe Mulungu.

8 Sekewazanywe uhawona muna iisi ngayengaye wodununzigwa na wobamanyigwa. Chila mtawala yowagaza ngayengaye kolangulizigwa na mtawala imwenga. Wawo wose wolangulizigwa na watawala wamwenga. 9 Mbali mfalume yahawalongela wanhu walime, kezawafaya wanhu wose muna iisi yake.

10 Munhu yolonda hela hezakwiguta hela na munhu yomelela mate vinhu one yaheng'higwa, hezakwiguta. Mbuli izo hazifaya. 11 Vinhu vihongezeka na wanhu wopula wokongezeka. Hela hazizamfaya tajili kwaviya wamwenga wezazilonda. 12 Nhongo za msang'hani zinoga, one kaja chidogo hebu ng'hani, mbali tajili hadaha kugona nhongo, kwaviya vinhu viyeli navo vomgaza ichilo chose.

13 Niwona mbuli ihile imwenga muna iisi, kuikila vinhu vingi hakumfaya munhu. 14 Vinhu vake vokwaga bila kuilunga na hamwande hawa na chinhu cha kuwalekela wanage. 15 Fana viya munhu viyezile ukengele kulawa muna iinda ya mami yake, niivo vondayasegele ukengele muna iisi. Hezadaha kusola chochose muna ivinhu vake. 16 Haifaya munhu kuiyoha kusang'hana usang'hano ng'hani kwaviya vinhu vake havikala. Kezasegela bila chinhu fana viyezile bila chinhu. Mbuli ino iha ng'hani. 17 Siku zose kakala muna diziza na lugano, muna yamagayo na mitamu.

18 Baho niwona kuwa vinoga munhu yaje na yang'we na yadeng'helele sang'hano yake iyosang'hana muna iisi siku izo ndodo zoyeng'higwe na Mndewa Mulungu, kwaviya ivo viyekiligwe na Mulungu. 19 One Mulungu yahamwing'ha munhu utajili na vinhu vingi na kumtenda yadeng'helele vinhu vake, munhu iyo yalave hewela na yadeng'helele voyapatile kwa vuke jake. Mbuli izo zose chitumetume chilawa kwa Mulungu. 20 Mulungu kamtenda yadeng'helele, ivo hezakuwa na lugano muna zisiku za ugima wake.