1 Vino yelihi yalingile fana munhu yeli na ubala?

Vino yelihi yovimanya kufambula mbuli ino?

Kuwa na ubala kochitenda chihanga cha munhu chitelele na chisamhuke.

2 Nolonga uzindilile lagilizo da mfalume, kwaviya kwiilaha kutenda ivo haulongozi wa Mulungu. 3 Sekeulopole kusegela haulongozi wa mfalume na sekeumbiduke, kwaviya mfalume kezatenda chiyolonda. 4 Kwaviya mbuli ya mfalume ina nguvu kufosa mbuli zimwenga zose. Vino yelihi yodaha kumuuza, "Weye kotenda choni?" 5 Munhu yozindilila malagilizo kezapata faida, iviya munhu mbala kolumanya lusita lufaya na voilondeka kutenda. 6 Kwaviya chila mbuli ina lusita lwake, ingawa wanhu wogaya ng'hani.

7 Habule yovimanya mbuli yondailawilile hamwande. Vino yelihi yodaha kulonga mbuli zikwiza? 8 Fana viya viili haidahika munhu kugwila mbeho, iviya haidahika munhu kukimbila ifa. Fana viya mtowang'hondo viyeli hadaha kuikimbila ng'hondo, iviya wihi haudaha kuwakombola wanhu woutenda. 9 Mbuli izo niziwona vinikalile nopelemba mbuli zisang'hanigwa muna iisi. Kuno munhu komtawala miyage na kumgaza.

10 Baho niwona wanhu wotenda mbuli zihile wowandigwa. Wanhu wawo wakala wokwingila na kulawa muna ikaye ya Mulungu na watogoligwa muna dibululu diya dowatendile mbuli zawo zihile. Mbuli izo zokwazaganya. 11 Kwaviya muhasanyi hatagusigwe hima hima, lekamana wanhu woilunga kutenda mbuli zihile. 12 Wahasanyi wotenda mbuli zihile miyanza gana na wogendelela kukala siku nyingi. Mbali novimanya wanhu womdumba Mulungu wezadeng'helela ugima wawo. 13 Na wanhu wotenda mbuli zihile hawezakongeziligwa siku zawo zili fana sisila, kwaviya hawamdumba Mulungu.

14 Kuna mbuli imwenga yokwazaganya muna iisi, wanhu wanogile wotendiligwa fana viwolondeka kutendiligwa wanhu wotenda mbuli zihile, iviya wanhu wotenda mbuli zihile wotendiligwa fana viwolondeka kutendiligwa wanhu wanogile. Mbuli iyo yokwazaganya.

15 Lelo niye nogesa kuwa munhu kolondeka kumweda, kwaviya hano hana iisi habule chinhu chinogile kufosa kuja na kung'wa na kudeng'helela. Zino izo mbuli munhu ziyodaha kuzitenda viyolava vuke siku za ugima wake ziyeng'higwe na Mulungu muna iisi.

16 Vinigesile muna umoyo wangu muladi nivimanye ubala na kulola sang'hano za wanhu hano hana iisi, nitola kuwa wanhu hawagona imisi hebu hawagona ichilo. 17 Wanhu hawazimanya sang'hano za Mulungu zitendeka muna iisi. Woiyoha kuzimanya mbali hawadaha. Wanhu wabala woigoda kuwa wozimanya, mbali kweli hawazimanyile.