1 Kuhishimigwa kunoga kufosa mavuta ya bei ng'hulu.

Ivo nolonga kuwa siku ya kudanganika inoga kufosa siku ya kwelekigwa.

2 Muhavu kuhita kuna indilo kufosa kuhita kuna didugila,

kwaviya yolondeka weli wagima wavimanye kuwa ifa yochigozela cheye chose.

3 Muhavu kuwa na usungu kufosa kuwa na seko, kwaviya usungu wochitenda chikangale.

4 Wanhu wabala wogesa mbuli ya ifa,

mbali wabozi wogesa madambwa muhala.

5 Muhavu kuzumigwa na wanhu wabala,

kufosa kutogozigwa na wanhu wabozi.

6 Kwaviya seko za wabozi zokwaga himahima fana miwa viitatalika muna umoto. Mbuli iyo yokwazaganya.

7 Uvwizi womtenda munhu mbala yawe mbozi,

na kuhokela lushwa komtenda munhu yaleke kugolosa imbuli.

8 Muhavu kukomeleza sang'hano kufosa kuyandusa,

yofunya umoyo kamweda kufosa yeli na magoda.

9 Sekeuwone ludoko himahima,

kwaviya ludoko lokala kwa wanhu wabozi.

10 Sekeulonge, "Habali lusita lwa umwaka lukala lunogile kufosa sambi?"

Kwaviya wanhu wabala hawauza mbuli fana iyo.

11 Kuwa na ubala kulinga fana uhazi,

chinhu chiwafaya ng'hani wanhu weli wagima.

12 Ubala na hela vodaha kumkaliza munhu,

iyo niiyo faida ya kuvimanya kukala goya,

ubala wokaliza ugima wa munhu.

13 Zigese goya mbuli ziyotenda Mulungu.

Vino yelihi yodaha kugolosa chinhu choyabandile Mulungu?

14 Muna zisiku za kudeng'helela udeng'helele, mbali muna zisiku za magayo uyagese magayo yayo. Mulungu katenda wanhu wadeng'helele iviya wagaye muladi sekewadahe kuvimanya chinhu chondachilawilile.

15 Muna zisiku ndodo za ugima wangu, niwona wanhu wotenda mbuli zinogile wodanganika ingawa wotenda mbuli zinogile, wanhu wotenda mbuli zihile wokala siku nyingi ingawa wogendelela kutenda mbuli zihile. 16 Sekeuigese munhu goya ng'hani na sekeuitende mbala ng'hani. Vino habali koinanga mwenyewo? 17 Sekeuwe msede ng'hani na sekeuwe mbozi. Vino habali udanganike lusita lwako halunafika? 18 Kolondeka uzindilile mbuli zose ziuzumigwe, kwaviya munhu yomtegeleza Mulungu kozindilila mbuli izo zose.

19 Ubala womtenda munhu mbala yawe mkulu kufosa watawala longo muna dibululu.

20 Ukweli habule munhu muna iisi yotenda mbuli zinogile muhala siku zose na hatenda uhasanyi. 21 Sekeuzike muumoyo mbuli zose zowolonga wanhu, muladi sekeumuhulike msang'hani wako viyokuduwila. 22 Weye mwenyewo kovimanya muumoyo wako kuwa kuwaduwila ng'hani wamwenga.

23 Mbuli zino nizilinga kwa ubala. Ivo nilonga, "Niwe na ubala," mbali nipotigwa. 24 Vino munhu kodahaze kuvimanya ugima viwili? Mbuli ino yokwazaganya. 25 Mbali niilunga kuvimanya na kuzahila ubala, iviya kuvimanya usede ni ubozi na ubozi ni umbunye. 26 Muhavu kudanganika kufosa kuwa mbozi. Ubozi wounamata munhu fana muke yeli na moyo ulingile mtego hebu lwavu lwa kugwilila. Makono yake yozingiliza fana minyololo. Munhu yomnogeza Mulungu koinega nayo mbali muhasanyi kogwiligwa nayo. 27 Mbuli zino nokulongela niye Mpetaji, nigeza kuzimanya mbuli zino ugaluga. 28 Nigendelela kuzahila mbuli izo, mbali sizipatile. Muna iwanhu elufu imwe, niwona mulume imwe munhu goya mbali siwonile hata muke imwe munhu goya. 29 Nipata mbuli iyo muhala. Mulungu kaumba wanhu wawe na hishima, mbali wawo wagesa kutenda mbuli nyingi zihile.