1 Nizigesa ng'hani mbuli zino na nihelela kulamula kuwa wanhu wotenda mbuli zinogile na wanhu wabala na sang'hano zowotenda zolangulizigwa na Mulungu. Habule munhu yovimanya kuwa kezatogoligwa hebu kezalekigwa. Hachidaha kuzimanya mbuli izo zondazilawilile hamwande. 2 Kwaviya wanhu wotenda mbuli zihile na wanhu wotenda mbuli zinogile wose wodanganika, wanhu welile na wambule mwiko, wanhu wolava nhambiko na wanhu hawalava. Wanhu wotenda mbuli zinogile na wanhu wotenda mbuli zihile wose wodanganika, ivo viili kwa waja woilaha na waja wodumba kuilaha.

3 Wanhu wose wodanganika, iviya mizoyo yawo iha na wabozi siku zose za ugima wawo, maabaho wodanganika. Mbuli iyo iha kufosa mbuli zose zilawilila muna iisi. 4 Mbali wanhu wagima wang'hali wololela. Imbwa kokwehuligwa, mbali muhavu imbwa mgima kufosa simba yafile yakalile yodumbigwa. 5 Kwaviya wanhu wagima wovimanya kuwa wezadanganika, mbali wadanganike hawamanya chinhu, iviya hawezalihigwa kaidi na wezazimizigwa. 6 Viwakalile wagima walonda wanhu na wawehila wanhu na wawawonela migongo, mbali mbuli izo zose zimala. Hawezailumba kaidi kutenda chinhu chochose chochilawilila muna iisi. 7 Ukaje ndiya yako kwa kudeng'helela na ung'we divai yako kwa kudeng'helela, kwaviya Mulungu kautogola usang'hano wako. 8 Iyawale viwalo vinogile na kuiboboda mavuta mditwi siku zose.

9 Udeng'helele kukala na muke wako iumulonda siku ndodo za ugima wako ziyakwing'hile Mulungu hano hana iisi. Kwaviya kulungiligwa ivo muna zisiku za ugima wako na muna isang'hano yako indala. 10 Chinhu chochose chondaulonde kutenda uchitende kwa kuiyoha, kwaviya uko kuzimu kuuhita kwabule sang'hano hebu kugesa hebu kuvimanya hebu ubala.

11 Niwona mbuli imwenga hano hana iisi. Magalu wa kukimbila viwoihuma hawahuma na wene nguvu hawahuma muna ing'hondo na wanhu wabala hawapata ndiya na weli na nzewele hawapata utajili na wasomi hawapata ukulu. Mbali habule yovimanya mbuli yondailawilile hamwande na izalawilila zuwaki.

12 Munhu havimanyile kezadanganika zuwaki. Fana viya somba viyokwenzeka muna ulwavu na ndege viyokwenzeka muna umtego, ivo munhu kopata hulo kwa kusinhukila.

13 Iviya hano hana iisi niwona simwe dino da ubala na ninogeligwa najo. 14 Kukala bululu dodo dili na wakaya wadodo. Mfalume yeli na nguvu kafika kudibululu na keka bumbila kulu da watowang'hondo muladi kuditowa bululu ijo. 15 Muna dibululu ijo mukala na munhu imwe ngayengaye mbala. Nayo kadikombola bululu ijo kwa ubala wake, mbali hamwande habule yamkumbuke ngayengaye iyo. 16 Ivo nilonga, "Ubala wofaya kufosa nguvu." Mbali mbuli za ngayengaye zokwehuligwa na habule munhu yozitegeleza.

17 Muhavu kutegeleza mbuli za ugaluga za munhu mbala,

kufosa kutegeleza nyangi za ubozi za mfalume.

18 Kuwa na ubala kunoga kufosa kuhuwila via va ng'hondo,

mbali muhasanyi imwe kobananga mbuli nyingi zinogile.