1 Maabaho nigesa, "Leka nitende madambwa muladi niideng'heleze." Mbali niwona kuwa kutenda ivo kokwazaganya. 2 Nilonga, "Seko ni ubozi. Vino madambwa yonitaza choni?" 3 Nigesa ng'hani vondanilusangalaze lukuli lwangu kwa divai kuno ning'hali nzewele zangu zonilanguliza kwa ubala na kutenda fana wabozi viwotenda muladi niwone chinhu chilihi chinogile kwa wanhu kutenda viwokala lusita luguhi muna iisi.

4 Nitenda mbuli ng'hulu, niizengela kaye na nihanda mizabibu muna imigunda. 5 Nilima migunda na vizi. Nihanda mibiki ya matunda ya mbasakanyo muna imigunda iyo. 6 Nihimbila malamba ya kuigumila mazi mibiki iyo. 7 Nigula watumwa wa chilume na nigula watumwa wa chike na watumwa wamwenga welekigwa muna ikaye yangu. Nikala na ng'hondolo wengi na ng'ombe wengi kufosa munhu yoyose yakalile Yelusalemu. 8 Niikila hela na zahabu na nilihigwa kulawa muna ingama ya wafalume na muna iisi, nipata wembaji wa chilume na wembaji wa chike. Iviya nipata wake womeleligwa mate na walume.

9 Nikala mkulu kufosa wose wanilongolele kukala muna dibululu da Yelusalemu. Lusita ulo lose nikala na ubala. 10 Chila chinhu chinimelele mate nichipata. Siukimilile moyo wangu kupata chochose chonimelele mate. Nideng'helela kusang'hana sang'hano zangu zose na mbuli iyo ikala gweko jangu. 11 Maabaho nigesa sang'hano zose zonisang'hane kwa makono yangu na viya vinilavile vuke vinikalile notenda ivo. Niwona kuwa mbuli izo zose zikala zokwazaganya na zilinga fana munhu yogwila mbeho, mbali hadaha.

12 Maabaho nyandusa kugesa fambulo da ubala na chichala na ubozi. Niiuzagiza, "Mfalume wa sambi kodaha kutenda choni?" Kezatenda fana viyatendile mfalume yamulongolele kutawala. 13 Niwona kuwa ubala unoga kufosa ubozi, fana bung'hulo vidinogile kufosa ziza. 14 Munhu mbala kowona kuyohita mbali mbozi kogenda muna diziza. Mbali nivimanya kuwa munhu mbala na mbozi uhelelo wawo umwe. 15 Maabaho nigesa, "Mbozi kezadanganika na niye nizadanganika, lelo habali niwa mbala fana vino?" Nigesa, "Mbuli izo zose zokwazaganya." 16 Habule yomkumbuka munhu yeli na ubala hebu munhu mbozi, kwaviya siku zikwiza wose wezazimizigwa. Mbala na mbozi wose wodanganika.

17 Ivo niwihila ugima wangu, kwaviya sang'hano zose zisang'hanigwa muna iisi zinhesa. Sang'hano zose zokwazaganya na zilinga fana munhu yogwila mbeho. 18 Nizihila sang'hano ndala zose zonisang'hane kwa kuiyoha hano hana iisi, kwaviya nolondeka nimulekele munhu yondayanihazi. 19 Vino yelihi yovimanya kezakuwa mbala hebu mbozi? Mbali yeye kezahazi vinhu vose vonipatile kwa kusang'hanila ubala wangu hano hana iisi. Iviya mbuli izo zose zokwazaganya. 20 Ivo vinigesile kaidi sang'hano ndala zinisang'hane hano hana iisi, nifa moyo.

21 Wanhu wosang'hana usang'hano kwa ufundi na ubala na umanyi, mbali wolondeka vinhu vawo vose wawalekele wanhu hawavigaiye. Mbuli izo zose zokwazaganya na ziha ng'hani. 22 Vino wanhu wopata choni kwa sang'hano zawo zose na kusafagila ng'hani muna zisang'hano ziwogaiya hano hana iisi? 23 Sang'hano zawo za siku zose zina mawine na manyulunyulu, nzewele zawo ichilo hazihumula kugesa. Mbuli izo zose zokwazaganya.

24 Habule chinhu chowotenda wanhu chinogile kutenda, mbali kuja na kung'wa na kudeng'helela sang'hano zawo. Nizimanya mbuli izo zilawa kwa Mulungu. 25 Mulungu iyo yoching'ha ndiya na usang'hano wa kudeng'helela. 26 Mulungu komwing'ha umanyi na ubala na deng'ho munhu yomnogeza, mbali komwing'ha muhasanyi usang'hano wa kuduganya vinhu vingi na kwika ngama. Mulungu komwing'ha vinhu ivo munhu yomnogeza. Iviya mbuli izo zokwazaganya na zilinga fana munhu yogwila mbeho.