1 Lava ndiya yako kwa makono maidi,

kwaviya siku za hamwande kwizaiwona kaidi.

2 Vinhu viulinavo uwagolele wanhu wengi viwe ngama,

kwaviya hudimanya hulo dondadilawilile muna iisi na kwizalonda kutazigwa.

3 Mvula yahakika, yotonya,

mbiki uhagwila kusi hebu kasikazi,

hanhu baho haugwile wizasigala baho.

4 Munhu yoyose yolola koiloza mbeho hezahanda,

na munhu yolola mawingu hezagobola.

5 One hudaha kuvimanya nzila ya mbeho, iviya hudaha kuvimanya mavuha ya mwana viyokula muna iinda ya mami yake, ivo huimanya sang'hano ya Mulungu yotenda vinhu vose.

6 Handa mbeyu zako imitondo na sekeuleke kuhanda ichigulogulo, kwaviya huzimanya mbeyu zilihi zondazote, ziya ziuhandile imitondo hebu ziuhandile ichigulogulo, hebu zose zizakota.

7 Bung'hulo dinoga. Kudiwona zuwa vidilawa komtenda munhu yasangalale.

8 Ivo munhu yahakala miyaka mingi, yadeng'helele mbuli zose, mbali yazikumbuke siku zikwiza yahamala kudanganika, kwaviya zizakuwa zabule uhelelo. Mbuli zikwiza zokwazaganya.

9 Weye mbwanga, deng'helela siku ziuli mbwanga, moyo wako usangalale lusita ung'hali mbwanga. Tenda chiugesa muna umoyo wako, mbali ukumbuke kuwa Mulungu kezakuhumiza kwa mbuli zose ziutendile. 10 Sekeudumbe chinhu chochose na sekeuyagese mawine yeli muna ulukuli, kwaviya uhawa mbwanga mbuli nyingi zofosa.