1 Maabaho niwona magayo yose muna iisi. Niwona wanhu wogazigwa viwolila masozi, mbali habule munhu yowaguma moyo. Waja wowagaza wana nguvu na habule munhu wa kuwaguma moyo. 2 Nigesa kuwa wanhu wadanganike wamweda kufosa wanhu wagima. 3 Mbali muhavu wanhu hawanavumbuka kufosa wanhu wawo, kwaviya hawanaziwona mbuli zihile zitendeka muna iisi.

4 Maabaho niwona kuwa wanhu wosang'hana usang'hano kwa kuiyoha kwaviya woiwonela migongo. Mbuli zose zokwazaganya na zilinga fana munhu yogwila mbeho.

5 Mbozi hatenda usang'hano, kuuhelelo koikoma na nzala.

6 Muhavu kuwa na vinhu vidodo kuno moyo wako uhola,

kufosa kuwa na vinhu vingi kuno koigaza kusang'hana sang'hano,

kwaviya kuiyoha kusang'hana sang'hano kulinga fana kugwila mbeho.

7 Maabaho niwona mbuli imwenga ya kwazaganya muna iisi. 8 Munhu imwe kabule mwana hebu ndugu wa kuhazi vinhu vake, mbali koiyoha kusang'hana sang'hano na kowona vinhu vake havifaya. Yaiuzagize, "Vino nomsang'hanila yelihi na habali noikimilila sekenideng'helele?" Mbuli izo zokwazaganya na zoguma usungu.

9 Muhavu kuwa waidi kufosa munhu yaidumwe, kwaviya wanhu waidi wezagwekigwa kwa sang'hano yawo. 10 One imwe wawo yahagwa, miyage komwinula. Mbali munhu yokala yaidumwe yahagwa kezagaya. Munhu iyo kabule munhu wa kumwinula. 11 Iviya kuhawa na mbeho, wanhu waidi wogona hamwe wopata vuke. Vino munhu yahagona yaidumwe kezapataze vuke? 12 Munhu yahawa yaidumwe kodaha kuhumigwa na mwihi, mbali wahawa waidi wezamuhuma. Nzabi nhatu zihogosigwe hamwe hazidumuka himahima.

13 Muhavu mbwanga ngayengaye yeli mbala kufosa mfalume mulala yeli mbozi yolema kuzumigwa. 14 Yodahika mbwanga yalingile iyo kodaha kuwa mfalume hata yahalawile muna ichifungo hebu yahelekwigwe ngayengaye. 15 Niwawona wanhu wose wokala muna iisi wamsondelela mbwanga imwenga yondayasole ufalume. 16 Peta ya wanhu haikalile na uhelelo na kawatawala wose, mbali waja welesi wa hamwande hawamnogele. Mbuli zose zokwazaganya na zilinga fana munhu yogwila mbeho.