1 Mbuli za mfalume Lemueli, kafundizigwa na mami yake,

2 Tegeleza mwanangu! Tegeleza mwana yonikweleke kulawa mwiinda yangu!

Tegeleza mwanangu yonikupulile kwa Mulungu.

3 Sekeukomeleze nguvu zako kwa kuwangala wanaake,

moyo wako sekeuwahuwile wawo wowananga wafalume.

4 Weye Lemueli, haifaya wafalume na walangulizi kung'wa divai,

na wakulu sekewaumelele mate upele.

5 Wahang'wa upele, wezazimiza malagilizo,

na wezawabamanya wanhu wolonda kutazigwa.

6 Weng'he upele wanhu weli habehi kudanganika,

weng'he divai wanhu weli na usungu ng'hani.

7 Waleke wang'we na wazimize ungayengaye wawo,

na sekewakumbuke kaidi usungu wawo.

8 Longa kwa ichimu cha wanhu hawadaha kulonga,

uwagombele wanhu wose welibule munhu wa kuwataza.

9 Longa na uhumize voilondeka,

uweng'he haki yawo ngayengaye na wolonda kutazigwa.

10 Vino yelihi yodaha kumpata muke yeli na moyo unogile?

Unovu wake wofosa vinhu va hela nyingi.

11 Mulumake komuhuwila yeye,

na yeye hapuwa chinhu chochose chinogile.

12 Yeye hamtendela mulumake mbuli zihile,

komtendela mbuli zinogile siku zose za ugima wake.

13 Kosona mawalo ya sufu na chitani,

na koiyoha kusang'hana usang'hano kwa makono yake mwenyewo.

14 Muke iyo kalinga fana meli za uchuuzi,

kwaviya kogala ndiya kulawa kutali.

15 Kolamka chilochilo,

koweng'ha ndiya wanhu weli muna ikaye yake,

na koweng'ha sang'hano wasang'hani wake wa chike.

16 Kogesa kugula mgunda na maabaho kogula,

kosang'hanila hela zake kuhanda mizabibu.

17 Kosang'hana sang'hano zake kwa nguvu,

na koyagangamiza makono yake.

18 Kovimanya kuwa sang'hano zake zina faida,

kosang'hana sang'hano mbaka ichilo kwa bung'hulo da chitasa chake.

19 Kohogosa nyuzi kwa makono yake mwenyewo,

kosona mawalo yake kwa vidole vake.

20 Kofungula makono yake koweng'ha vinhu vake ngayengaye,

kogolola mkono wake kuwataza wanhu wolonda kutazigwa.

21 Chihuhwe chahafika, hadumba kwa ichimu cha wanhu wake,

kwaviya wose kawavaza mawalo yazamile.

22 Kosona migolole ya komwa jake,

koyawala mawalo madung'hu ya chitani inogile.

23 Mulumake kohishimigwa hana ulwivi lukulu lwa bululu,

viyokala uko hamwe na walala wa isi.

24 Muke iyo kosona mawalo ya chitani na kuyachuuza,

kowachuuzila mikwiji wanhu wochuuza vinhu.

25 Kokuwa na nguvu na hishima,

kodaha kuseka bila kudumba siku zikwiza.

26 Kolonga kwa ubala,

na kowafunza wanhu kwa moyo umwe.

27 Kolola mbuli zitendeka muna ikaye yake,

siyo munhu mbwa.

28 Wanage wolamka na womtogoza,

iviya mulumake komtogoza,

29 kolonga, "Wanaake wengi wotenda vinhu vinogile,

mbali weye kuwahuma wose."

30 Kuihamba ng'hani ni uvwizi na unovu wa chihanga womala himahima,

mbali muke yomdumba Mndewa Mulungu kotogozigwa.

31 Umgweke kwa sang'hano zake zose,

yatogozigwe hana ulwivi lukulu lwa bululu kwa sang'hano ziyatendile.