1 Upele wowatenda wanhu wehuligwe na chinhu chikola chigala ndwagi,

wanhu wokwagizigwa kwa vinhu ivo wabule ubala.

2 Ludoko lwa mfalume lulinga fana mbumo wa simba,

wanhu womtenda yehilwe wezadanganika.

3 Wanhu wahayepula na ndwagi wohishimigwa,

mbali wabozi watatali wolonda ndwagi.

4 Wanhu wabwa hawalonda kulima muna ulusita lwa kulima,

mbali chipindi cha kugobola wezapula na hawezapata chinhu.

5 Vinhu viwogesa wanhu muna imizoyo vilinga fana mazi yagidimile,

mbali wanhu wovimanya wovideha.

6 Wanhu wengi woigoda kuwa wana ulondo wa kufunya umoyo,

mbali wanhu wadodo wokwaminika.

7 Wanhu wotenda mbuli zinogile wokala bila ubananzi,

na wanawo watemeligwa mate.

8 Mfalume yokala hana ichigoda cha kuhumiza,

iyo kobeta wihi wose kwa meso yake.

9 Vino yelihi yodaha kulonga, "Niusafya moyo wangu,

niye nyela na nabule uhasanyi?"

10 Ningo za chivwizi na mhishi za chivwizi,

Mndewa Mulungu kovihila vose vidi.

11 Wana womanyika kuwa wanoga hebu weha kwa chiya chiwotenda.

12 Gutwi dodihulika na ziso dodiwona,

ivo vose kavilumba Mndewa Mulungu.

13 Sekeulonde kugona, buleivo kwizakuwa ngayengaye,

sang'hana usang'hano na kwizapata ndiya ya kufaya.

14 Munhu yogula kolongelela, "Havinogile, havinogile,"

mbali yahasegela koitogoza kwa kuhunguziligwa bei.

15 Kuna zahabu na mabwe mengi ya hela nyingi,

mbali munhu yolonga kwa umanyi kalinga fana dibwe da hela nyingi.

16 Munhu yahamwikila zamana munhu hamanyika,

udisole walo jake kuwa lehani.

17 Ndiya ipatike kwa uvwizi yamulile,

maabaho izakuwa fana msanga muna umulomo wako.

18 Malungilo yanogile yotendeka kwa kutogola magesa yanogile,

uhalonda kuitowa ng'hondo uwauze wanhu wovimanya.

19 Wadesi wolonga sili za wanhu,

ivo uyepule na wanhu wawo.

20 One munhu yahamduwila tati yake hebu mami yake,

kezadanganika fana chitasa vochizimigwa muna diziza totolo.

21 Uhazi upatike mwanduso himahima,

hawizatemeligwa mate kuuhelelo.

22 Sekeulonge, "Nizakuliha kwa ubananzi uno!"

Mgozele Mndewa Mulungu, kezakutaza.

23 Mndewa Mulungu kokwihila ningo za uvwizi,

na mhishi za uvwizi hazimnogeza.

24 Ugenzi wa munhu wolongozigwa na Mndewa Mulungu,

lelo munhu kodahaze kuimanya nzila yake mwenyewo?

25 Wanhu woilaha himahima kwa Mulungu,

hamwande wovigesa kaidi vilaho vawo.

26 Mfalume mbala kobeta wanhu wehi,

kowatagusa bila ubazi wanhu wotenda mbuli zihile.

27 Muhe wa munhu ulinga fana chitasa cha Mndewa Mulungu,

wopekula chila chinhu chili muna umoyo wake.

28 Ulondo na waminika womtenda mfalume yakale goya,

kufosela ulondo wa kufunya umoyo, chigoda chake cha chifalume chogangamala.

29 Wabwanga woigodela nguvu zawo,

na walala woigodela uhenga.

30 Kulanhigwa kowatenda wanhu waleke kutenda mbuli zihile,

na kutowigwa kowatenda wanhu watende mbuli zinogile.