1 Wana wabala wohulika chiya chiwolongiligwa na tati zawo,

mbali wakewezi hawahulika viwozumigwa.

2 Wanhu wezapata mbuli zinogile kwa matunda ya milomo yawo,

mbali wavwizi wolonda usede.

3 Wanhu woteganya kulonga wokaliza ugima wawo,

mbali wanhu wohanja wezanangigwa.

4 Wanhu wabwa womelela mate ng'hani na hawapata chochose,

mbali wanhu woiyoha wezapata vinhu vingi.

5 Wanhu wotenda mbuli zinogile wokwihila kulonga uvwizi,

mbali wanhu wotenda mbuli zihile woguma chinyala na wokwehuligwa.

6 Wanhu wotenda mbuli zinogile wezakalizigwa vinogile,

mbali wanhu wotenda mbuli zihile wezanangigwa.

7 Munhu imwe koitenda tajili, mbali kabule chinhu chochose,

munhu imwenga koitenda ngayengaye, mbali kana vinhu vingi.

8 Utajili wa munhu wolondeka kukombola ugima wake,

mbali munhu ngayengaye kabule chinhu cha kumdumbiza.

9 Wanhu wotenda mbuli zinogile womwemwesa fana bung'hulo,

mbali wanhu wotenda mbuli zihile wozimigwa fana vitasa.

10 Magoda yogala ndwagi,

mbali wanhu wotegeleza magesa yanogile wana ubala.

11 Hela ipatike kwa ubamanyi izakwaga,

mbali wanhu woduganya chidogo chidogo wezakongezeligwa.

12 One wanhu hawapatile chinhu chowohuwila kupata, wokuwa na usungu,

mbali wahapata chinhu chowohuwila wodeng'helela.

13 Wanhu wokwehula mafundizo woinanga wenyewo,

mbali wanhu wozindilila malagilizo wezagwekigwa.

14 Mafundizo yanogile ni chandusilo cha ugima,

yowataza wanhu kuyepula na mitego ya ifa.

15 Wanhu wowodaha kusagula vinogile wohishimigwa,

mbali wanhu haweli waminika wezanangigwa.

16 Wanhu wabala wosang'hana kwa umanyi,

mbali wabozi wolagusa ubozi wawo.

17 Msenga heli mwaminika kokwingila muna yamagayo,

mbali msenga mwaminika kogala uhonyi.

18 Wanhu hawalonda kuzumigwa wopata ungayengaye na chinyala,

mbali wanhu wotogola kuzumigwa wohishimigwa.

19 Wanhu wahapata chinhu chowahuwile wodeng'helela,

mbali wabozi wokwihila kuleka kutenda mbuli zihile.

20 Wanhu wogenda na wabala wezakuwa wabala,

mbali wambwiya wa wabozi wezagaya.

21 Magayo yowawingisa wahasanyi,

mbali wanhu wotenda mbuli zinogile wezapata vinhu vinogile.

22 Wanhu wotenda mbuli zinogile wowalekela uhazi wana wawo,

mbali utajili wa wahasanyi wekiligwa wanhu wotenda mbuli zinogile.

23 Mgunda wa ngayengaye wodaha kulava ndiya nyingi,

mbali wabamanyi wowahoka ndiya izo.

24 Wanhu hawawalanha wanawo wowehila,

mbali wanhu wowazuma wanawo wowalonda.

25 Wanhu wotenda mbuli zinogile woja mbaka wokwiguta,

mbali zinda za wanhu wotenda mbuli zihile zosafagila kwa nzala.