1 Mwanangu, tegeleza mbuli zangu za ubala,

kinga digutwi uhulike mbuli zangu za umanyi,

2 muladi udahe kusagula mbuli zinogile,

na mbuli ziulonga zolagusa umanyi wako.

3 Kwaviya mulomo wa mwanamke malaya unoga fana uki,

na mbuli zake zotelebuka kufosa mavuta.

4 Mbali wausungu kufosa sungu,

wokutwa fana panga dinoligwe kuno na kuno.

5 Migulu yake yohulumukila kuzimu,

na kohita nzila ya kuna dileme.

6 Kaizimiza nzila yoihita kuugima,

mbali kogeza nzila zake zigoloka.

7 Ivo mwanangu, nitegeleze goya,

sekeuleke mbuli zonikulongela.

8 Ukale nayo kutali,

sekeulukwenhukile lwivi lwa kaye yake.

9 One hutendile ivo, hwizahishimigwa na wanhu wamwenga,

na hwizakomigwa na wasede.

10 Nyambenyambe wezapata utajili wako,

vinhu vako vizakuwa muna ikaye ya munhu imwenga.

11 Kuuhelelo wa ugima wako kwizalila kwa usungu,

lusita lukuli lwako vondalulale.

12 Kwizalonga, "Silondile kuzumigwa.

Moyo wangu ulema kukalikiligwa.

13 Siwategeleze wafundiza wangu,

na sitegeleze mafundizo yawo.

14 Lelo nogwa chinyala, hana umting'hano wa wanhu."

15 Sekeudehe mazi muna ing'hupulilo ya munhu imwenga,

sigala na muke wako na umbandame yeye muhala,

fana munhu viyong'wa mazi yolawa muna ing'hupulilo yake mwenyewo.

16 Kumbandama muke imwenga kulinga fana kwitila mazi yanogile muna dikulugumbi,

sekeutende ivo.

17 Umbandame muke wako muhala,

sekeuwabandame wake wamwenga.

18 Umdeng'helele muke iumsolile ung'hali mbwanga.

19 Yeye kanoga na kogenda vinogile fana mhala,

ulondo wake ukudeng'heleze siku zose,

unogelwe na ulondo wake siku zose.

20 Mwanangu, habali unogelwe na mwanamke malaya?

Habali umbandame muke imwenga?

21 Mndewa Mulungu kolola chila chinhu,

kolola chila chinhu chiyotenda munhu.

22 Sang'hano zihile za wanhu wehi zowanamata wenyewo,

uhasanyi wawo ulinga fana nzabi zoziwatataliza.

23 Wezadanganika kwaviya hawadaha kuzikimilila tamaa zawo,

wavwiziligwa kwa ubozi wawo wenyewo.