1 Mndewa Mulungu kozihila ningo za kubamanya wanhu,

mbali konogelwa na ningo zigoloke.

2 Magoda yaheza, chinyala nacho chokwiza,

mbali unyendanyenda wokwiza na ubala.

3 Wanhu wotenda mbuli zinogile wolangulizigwa na ukweli,

mbali wanhu hawaminika wonangigwa kwa udelenya wawo.

4 Utajili haufaya chinhu muna isiku ya nhaguso,

mbali kutenda mbuli zinogile kowakombola wanhu muna iifa.

5 Wanhu wotenda mbuli zinogile wosondelela nzila zigoloke,

mbali wanhu wotenda mbuli zihile wezanangigwa kwa wihi wawo.

6 Wanhu wotenda mbuli zinogile wezakomboligwa,

mbali wanhu weli siyo waminika wonamatigwa na malungilo yawo yehile.

7 Wanhu wotenda mbuli zihile wahadanganika, huwilo jawo dokwaga,

kwaviya woihuwila wenyewo.

8 Wanhu wotenda mbuli zinogile, wokomboligwa kulawa muna uuzidilwa,

wanhu wotenda mbuli zihile wokwingila umo.

9 Viwolonga, wanhu hawamuhuwila Mulungu wowananga wakaya wayawo,

mbali kwa umanyi wanhu wotenda mbuli zinogile wokomboligwa.

10 Wanhu wotenda mbuli zinogile wahatemeligwa mate, wanhu wamwenga wodeng'helela,

na wanhu wotenda mbuli zihile wahadanganika, wanhu wa wamwenga wosekelela.

11 Bululu dokuwa kulu one wanhu wotenda mbuli zinogile wahaditemela mate,

mbali bululu donangigwa kwa milomo ya wanhu wotenda mbuli zihile.

12 Wanhu welibule nzewele wowazeha wakaya wayawo,

mbali wanhu weli na umanyi wonyamala.

13 Wanhu wadesi wolonga sili,

mbali wanhu waminika woika muumoyo.

14 Isi ilibule walangulizi wabala izakugwa,

mbali isi ili na wakulu wengi izagangamala.

15 Wanhu woilava kuwalihila nyambenyambe madeni yawo, kweli wezagaya,

mbali wanhu wolema kuilava kuwalihila wanhu wamwenga madeni yawo, wezakala goya.

16 Wake weli na ubazi wohishimika,

mbali watatali weli na nguvu wopata utajili.

17 Wanhu wowawonela ubazi wamwenga, wezagwekigwa,

mbali wanhu wasede woigalila magayo wenyewo.

18 Wanhu wotenda mbuli zihile wezapata gweko da uvwizi,

mbali wanhu wotenda mbuli zinogile wopata gweko da kweli.

19 Kweli wanhu wotenda mbuli zinogile wopata ugima,

mbali wanhu wotenda mbuli zihile wolonda ifa.

20 Mndewa Mulungu kowehila ng'hani wanhu wogesa mbuli za kutibusa,

mbali konogelwa na wanhu welibule ubananzi.

21 Kweli wanhu wotenda mbuli zihile hawaswela kutagusigwa,

mbali wanhu wotenda mbuli zinogile wezailegeha.

22 Fana vitindi va zahabu muna imhula ya nguluwe,

niivo viyeli mwanamke yanogile havimanyile kusagula vinogile.

23 Vinhu vowolonda wanhu wotenda mbuli zinogile, vogala unovu,

mbali vinhu vowolonda wanhu wotenda mbuli zihile vomguma ludoko Mulungu.

24 Wanhu wolava kwa makono maidi wokongezeligwa,

mbali wanhu wagila wokuwa ngayengaye.

25 Wanhu wolava vinhu kwa makono maidi wezatemeligwa mate,

wanhu wowang'wiza mazi wamwenga wezakung'wizigwa.

26 Wanhu womduwila munhu yowema wanhu ndiya,

mbali wanhu womtemela mate munhu yotogola kuchuuza ndiya.

27 Wanhu wozahila mbuli zinogile wolondigwa na wanhu,

mbali wanhu wozahila mbuli zihile wezazipata.

28 Wanhu wohuwila utajili wawo wezakugwa,

mbali wanhu wotenda mbuli zinogile wezatelela fana yani bisi.

29 Wanhu wogala magayo muna zikaye zawo hawezahazi chochose,

na wabozi watatali wezakuwa wasang'hani wa wanhu wabala.

30 Tunda da wanhu wotenda mbuli zinogile ni ugima,

na wanhu wabala wowakwega wanhu.

31 One wanhu wotenda mbuli zinogile wahahokela gweko jawo muna iisi,

iviya wanhu hawamdumba Mulungu na wahasanyi wezahokela gweko jawo da nhaguso.