1 Masimwe ya Sulemani,

mwana mbala komtenda tati yake yadeng'helele,

mbali mwana mbozi komtenda mami yake yawone usungu.

2 Vinhu voupata kwa kutenda wihi havifaya chinhu,

mbali kutenda mbuli zinogile komulopola munhu kulawa muna iifa.

3 Mndewa Mulungu hawaleka wanhu wotenda mbuli zinogile wakale na nzala,

mbali kolema wanhu wotenda mbuli zihile sekewegute.

4 Wanhu wabwa wokuwa ngayengaye,

mbali wanhu wosang'hana sang'hano kwa kuiyoha wokuwa na vinhu vingi.

5 Munhu yoduganya lusita lwa kugobola mbala,

mbali munhu yogona chipindi cha kugobola koguma chinyala.

6 Wanhu wotenda mbuli zinogile wotemeligwa mate,

mbali wanhu wotenda mbuli zihile, viwolonga wofisa malungilo yawo ya usede.

7 Mazina ya wanhu wotenda mbuli zinogile, yezasang'haniligwa kutemela mate,

mbali mazina ya wanhu wotenda mbuli zihile yezakwaga.

8 Wabala wotogola malagilizo,

mbali wabozi watatali wohanja, wezanangigwa.

9 Wanhu wotenda chiwolonga wokala goya,

mbali wanhu wadelenya wezamanyika.

10 Wanhu wofunyiza kwa uvwizi wogala magayo,

na wabozi watatali wohanja, woinanga wenyewo.

11 Milomo ya wanhu wotenda mbuli zinogile ilinga fana nzasa za mazi zozigala ugima,

mbali wanhu wotenda mbuli zihile viwolonga wofisa malungilo yawo ya usede.

12 Kwiihila kogala ndwagi,

mbali ulondo wolekelela uhasanyi wose.

13 Mbuli za ubala zopatika muna imilomo ya wanhu wovimanya,

mbali wabozi wezatagusigwa kwa kulanhigwa mibalati mumgongo.

14 Wanhu wabala wokongeza umanyi fana ngama,

mbali wabozi watatali wohanja, wogala kunangigwa.

15 Utajili wa munhu yeli na vinhu vingi ulinga fana bululu dili na mhongono,

uchiwa wa ngayengaye womtenda yanangigwe.

16 Wanhu wotenda mbuli zinogile wolihigwa ugima,

mbali wanhu wotenda mbuli zihile wolihigwa nhaguso.

17 Wanhu wotogola kuzumigwa wezakuwa wagima,

mbali wanhu wokwehula kulamuligwa wokwaga.

18 Wanhu wowehila wayawo kwa mvisa ni wadelenya,

wanhu wowalongeleza uvwizi wayawo ni wabozi.

19 Kulonga ng'hani kowatenda wanhu wahasanye,

mbali wanhu wokimilila ndimi zawo wotenda goya.

20 Ndimi za wanhu wotenda mbuli zinogile zilinga fana hela inogile,

mbali mizoyo ya wanhu wotenda mbuli zihile, haifaya chinhu.

21 Mafundizo ya wanhu wotenda mbuli zinogile yowataza wanhu wamwenga,

mbali wabozi watatali wodanganika kwaviya hawavimanyile.

22 Kutemela mate kwa Mndewa Mulungu kogala utajili,

na hakuhanganyigwa na usungu.

23 Wabozi wodeng'helela kutenda mbuli zihile,

mbali wanhu weli na nzewele wolonda ubala.

24 Vinhu vowodumba wanhu wotenda mbuli zihile, niivo vondawapate,

viwolonda wanhu wotenda mbuli zinogile wezakwing'higwa.

25 Vulavumbi dihafosa, wanhu wotenda mbuli zihile wezasegezigwa,

mbali wanhu wotenda mbuli zinogile wezakwima chigangamavu siku zose.

26 Fana siki muna umulomo,

fana yosi muna yameso,

niivo viyeli munhu mbwa kwa waja wamtumile kusang'hana.

27 Kumdumba Mndewa Mulungu kokongeza siku za kuwa mgima,

mbali miyaka ya wanhu wotenda mbuli zihile izahunguzigwa.

28 Wanhu wotenda mbuli zinogile wohuwila deng'ho,

mbali chinhu chowololela wanhu wotenda mbuli zihile hachilawilila.

29 Mndewa Mulungu kowakaliza wanhu wotenda mbuli zinogile,

mbali kowananga wanhu wotenda mbuli zihile.

30 Wanhu wotenda mbuli zinogile hawezasegezigwa,

mbali wanhu wotenda mbuli zihile hawezasigala muna iisi.

31 Wanhu wotenda mbuli zinogile wolonga kwa ubala,

mbali Mulungu kezawafudaza wanhu wolonga uvwizi.

32 Wanhu wotenda mbuli zinogile wovimanya mbuli ifaya kulonga,

mbali wanhu wotenda mbuli zihile wolonga mbuli za uvwizi.