1 Kwidika kwa uhole kogalula ludoko,

mbali mbuli zihile zoguma ludoko.

2 Wabala wahalonga, wanhu wamwenga wolonda kuvimanya ng'hani,

mbali wabozi wolonga mbuli za chibozi.

3 Meso ya Mndewa Mulungu yowona chila hanhu,

yolola wanhu wotenda mbuli zinogile na wanhu wotenda mbuli zihile.

4 Mbuli zinogile zogala ugima,

mbali mbuli za uvwizi zogala mawine muna umoyo.

5 Wabozi watatali wolema kuzumigwa na tati zawo,

mbali wanhu wotogola kuzumigwa, wolagusa ubala.

6 Kaye za wanhu wotenda mbuli zinogile zina ngama nyingi,

mbali wanhu wotenda mbuli zihile wogobola magayo.

7 Milomo ya wanhu wabala yopwililisa umanyi,

mbali mizoyo ya wanhu wabozi haili ivo bule.

8 Mndewa Mulungu kokwihila nhambiko za wanhu wotenda mbuli zihile,

mbali kodeng'helela wanhu wotenda mbuli zinogile viwompula.

9 Mndewa Mulungu koyehila malungilo ya wanhu wotenda mbuli zihile,

mbali kowalonda wanhu wotenda mbuli zinogile.

10 Wanhu woleka nzila ya kweli wezatagusigwa ng'hani,

na wanhu wolema kuzumigwa wezadanganika.

11 One Mndewa Mulungu kovimanya kuzimu na kombo da kunangigwa,

vino magesa ya wanhu yodahaze kuifisa haulongozi wake?

12 Wehulaji hawalonda wanhu wowazuma,

na hawahita kwa wanhu wabala.

13 Moyo wili na deng'ho wotenda chihanga chisamhuke,

mbali mawine ya moyo yolugalila luholozi lukulu.

14 Moyo wa munhu yeli na nzewele wozahila umanyi,

mbali mulomo wa mbozi woja ubozi.

15 Siku zose za munhu yogaya ziha,

mbali siku za munhu yeli na moyo usamhuke ni dugila.

16 Muhavu uwe ngayengaye na kumdumba Mndewa Mulungu,

kufosa kuwa na utajili na magayo.

17 Muhavu kuja bwasi hamwe na wanhu wouwalonda,

kufosa kuja nyama ya ndama yanenehe hamwe na wanhu wouwehila.

18 Wanhu wowona ludoko himahima wokong'hela ndwagi,

mbali wanhu wokalama kuwona ludoko wohoza ndwagi.

19 Nzila ya munhu mbwa izibigwa na miwa,

mbali nzila ya munhu yotenda mbuli zinogile ni kulugumbi dinogile.

20 Wana wabala wowatenda tati zawo wadeng'helele,

mbali wabozi wowehila mami zawo.

21 Ubozi wowatenda wabozi wadeng'helele,

mbali wanhu wovimanya wogenda muna zinzila zigoloke.

22 Malungilo hayafikizigwa kwa ichimu cha kupuwa magesa yanogile ya wanhu wamwenga,

mbali kuhawa na magesa mengi yanogile yofikizigwa.

23 Kwidika kunogile kowadeng'heleza wanhu,

na mbuli inogile ng'hani yolongigwa lusita lufaya.

24 Wanhu wabala wogenda muna inzila yoihita kuugima, muladi sekewahite kuzimu.

25 Mndewa Mulungu kobomola kaye za wanhu weli na magoda,

mbali kokaliza mhaka za wagane.

26 Mndewa Mulungu kokwihila magesa ya wanhu wotenda mbuli zihile,

mbali konogelwa na mbuli za kuwataza wamwenga.

27 Wanhu waselesi wowagalila ndugu zawo magayo,

mbali wanhu wokwihila lushwa wezakuwa wagima.

28 Mizoyo ya wanhu wotenda mbuli zinogile yogesa kwidika voilondeka,

mbali milomo ya wanhu wotenda mbuli zihile yolonga mbuli zihile.

29 Mndewa Mulungu heli habehi na wanhu wotenda mbuli zihile,

mbali kotegeleza wanhu wotenda mbuli zinogile viwopula.

30 Chihanga chihasamhuka chotenda moyo udeng'helele,

na mbuli zinogile zosangalaza mavuha.

31 Wanhu wotegeleza ndagilizi zigala ugima,

wezakala hamwe na wanhu wabala.

32 Wanhu wolema kuzumigwa woyehula wenyewo,

mbali wanhu wose wotogola kuzumigwa wopata umanyi.

33 Uhamdumba Mndewa Mulungu kwizaifunza ubala,

na unyendanyenda womulongolela hishima.