1 Uhakala hasi kuja ndiya hamwe na mtawala,

uteganye muladi utende voilondeka.

2 One uhawa na nzala ng'hani,

uleke umelo wako wa kuja ndiya.

3 Sekeulonde kuja ndiya zake zinogile,

kwaviya ndiya izo zodaha kukuvwizila.

4 Sekeugaiye kupata utajili,

na sekeugese ng'hani kupata vinhu vingi.

5 Kobalika na utajili wosegela,

wokuwa fana upata mabawa,

woguluka fana masumula na kwaga.

6 Sekeuje ndiya ya munhu mgila,

iviya sekeumelele mate ndiya zake zili mulile,

7 kwaviya yeye kogesa bei.

Kokulongela, "Uje na ung'we,"

mbali moyo wake hauli hamwe na weye.

8 Kwizadeka ndiya iyo yuudile,

na kwizakwagiza mbuli zako za kumtogoza.

9 Sekeulonge na wanhu wabozi,

kwaviya wezazizeha mbuli zako za umanyi.

10 Sekeusegeze dibwe da mhaka da umwaka,

na sekeusole migunda ya wachiwa,

11 kwaviya Mulungu yowalolesa kana nguvu,

na kezawagombela sekeuwatende vihile.

12 Tegeleza mafundizo,

sang'hanila magutwi yako utegeleze mbuli za umanyi.

13 Sekeuleke kumulamula mwana,

uhamulanha hezadanganika.

14 Mulanhe na balati,

muladi umkombole kulawa kuzimu.

15 Mwanangu, one uhawa mbala, nizadeng'helela.

16 One uhalonga mbuli zilondeka,

nizadeng'helela muna umoyo wangu.

17 Sekeuleke moyo wako uwawonele migongo wahasanyi,

mbali siku zose uiyohe kumdumba Mndewa Mulungu.

18 Kweli kwizagwekigwa,

na huwilo jako hadizakwaga.

19 Mwanangu, tegeleza na uwe na ubala,

ugese vinogile viya voukala.

20 Sekeuilumbe na wanhu wokoligwa,

hebu wanhu weli na usu wa nyama,

21 kwaviya wanhu wokoligwa na wamelo wokuwa ngayengaye,

kukukila kowavaza matambala.

22 Mtegeleze tati yako yakweleke,

na sekeumwehule mami yako yahalala.

23 Gula ukweli na sekeuuchuuze,

iviya gula ubala na mafundizo na umanyi.

24 Wanhu wotenda mbuli zinogile, tati zawo wodeng'helela ng'hani,

na wanhu wowadeng'helela wanawo wabala.

25 Tati yako na mami yako wadeng'helele ng'hani,

iviya mami yako yakweleke yasekelele.

26 Mwanangu, kinga digutwi utegeleze vonilonga,

na ulole chonitenda.

27 Mwanamke malaya kalinga fana kombo tali,

kowatenda walume wengile umo na wamuhasanye Mulungu.

28 Mwanamke malaya kogozela fana mbavi,

na kowatenda walume wengi sekewaminike.

29 Yelihi yogaya? Yelihi yeli na usungu?

Yelihi yeli na ndwagi?

Yelihi yolongelela?

Yelihi yeli na mawanga bila chimu?

Yelihi yeli na meso madung'hu?

30 Niiwawo wong'wa ng'hani divai,

wohita kuzahila divai ihanganyigwe na vilungo.

31 Sekeumelele mate divai,

voinang'hana muna ichikonha,

kuno yokwingila vinogile muna dimelo.

32 Kuuhelelo yoluma fana sungu ya zoka,

na sungu yake ilinga fana ya zoka da muyombo.

33 Meso yako yezawona mbuli ngeni,

na moyo wako wizagesa mbuli za mdukula.

34 Kwizakuwa fana munhu yogona muna imeli lusita lwa beho,

hebu fana munhu yogona uchanyha ya meli viyandusa kusegela.

35 Kwizalonga, "Wanitowa mbali silumile!

Wanilanha, mbali siwonile usungu!

Nizalamka zuwaki,

muladi nikazahile divai nikang'we kaidi?"