1 Muke mbala kogangamiza mzengo wake,

mbali muke mbozi koutula mzengo wake kwa makono yake mwenyewo.

2 Wanhu wotenda mbuli zinogile womdumba Mndewa Mulungu,

mbali wanhu wotenda mbuli zihile womzeha Mulungu.

3 Wabozi watatali wotagusigwa kwa mbuli zawo za magoda,

mbali mbuli za wanhu wabala zowakaliza.

4 One habule ng'ombe wa kulima, madungu yokuwa yabule chinhu,

mbali kwa nguvu za ng'ombe wa kulima ndiya yokuwa nyingi.

5 Msindila yokwaminika halonga uvwizi,

mbali msindila wa uvwizi kolonga uvwizi.

6 Wehulaji wozahila ubala na hawaupata,

mbali wanhu wovimanya wahuha kuifunza.

7 Sekeuihanganye na munhu mbozi,

kwaviya hadaha kukulongela mbuli za umanyi.

8 Wanhu wabala wogesa mbuli zawo ziwotenda,

mbali ubozi wa wabozi wowavwizila wenyewo.

9 Wabozi watatali wosekelela kutenda uhasanyi,

mbali unovu wopatika kwa wanhu wotenda mbuli zinogile.

10 Moyo woumanya usungu wake wenyewo,

habule munhu imwenga yodaha kudeng'helela hamwe nawo.

11 Kaye za wanhu wotenda mbuli zihile zizabomoligwa,

mbali mahema ya wanhu wotenda mbuli zinogile yezagangamala.

12 Kuna nzila yoiwoneka inoga kwa munhu,

mbali kuuhelelo yogala ifa.

13 Usungu wodaha kufisigwa muna ziseko,

na uhelelo wa deng'ho wodaha kuwa usungu.

14 Wanhu watatali wezalihigwa kwa mbuli zawo zihile,

wanhu wotenda mbuli zinogile wezagwekigwa.

15 Wanhu hawavimanyile wohuwila chila chinhu chiwolongeligwa,

mbali wanhu wabala wolola goya ugenzi wawo.

16 Wanhu wabala womdumba Mndewa Mulungu na woyepula kutenda mbuli za mdukula,

mbali wabozi wokwehula mbuli zose.

17 Wanhu wopata ludoko himahima wotenda mbuli za chibozi,

wanhu waselesi wokwihiligwa.

18 Wanhu hawavimanyile wohazi ubozi,

mbali wabala woyawalizigwa makombelo ya umanyi muna yamatwi yawo fana gweko.

19 Wanhu wotenda mbuli zihile wezatumbala mavindi haulongozi ha wanhu wotenda mbuli zinogile,

na wanhu wehi wezatumbala mavindi hana zinyivi za wanhu wanogile.

20 Ngayengaye hawalondigwa mbaka na wakaya wayawo,

mbali matajili wana wambwiya wengi.

21 Wanhu wowehula wakaya wayawo wotenda uhasanyi,

mbali watemeligwa mate wanhu waja wowawonela ubazi wanhu wolonda kutazigwa.

22 Vino wanhu woilunga kutenda mbuli zihile hawabananga?

Mbali wanhu wogesa mbuli zinogile wolondigwa na wamwenga na wokwaminika.

23 Usang'hano wowose uhatendigwa kwa kuiyoha wogala faida,

mbali kulonga muhala kogala ungayengaye.

24 Kombelo da wanhu wabala ni vinhu vawo,

mbali ubozi wa wabozi wolela ubozi.

25 Msindila wa kweli kokombola ugima wa wanhu,

mbali msindila wa uvwizi kolonga uvwizi.

26 Wanhu womdumba Mndewa Mulungu wogangamala,

na wanawo wezakuwa na hanhu ha kukimbilila.

27 Kumdumba Mndewa Mulungu kulinga fana nzasa igala ugima,

muladi kuyepula na mitego ya ifa.

28 Mfalume yahawatawala wanhu wengi kotogozigwa na wanhu,

na bila kuwatawala wanhu mkulu kokwaga.

29 Wanhu wokalama kupata ludoko wovimanya ng'hani,

mbali wanhu wopata ludoko himahima wolagusa ubozi.

30 Moyo wili tindiwalo wowing'ha ugima lukuli,

mbali migongo yotenda lukuli lusoke.

31 Wanhu wowawonela ngayengaye womzeha mulumbaji wawo,

mbali wanhu wowawonela ubazi wanhu wolonda kutazigwa wamuhishimu Mulungu.

32 Wanhu wehi wonangigwa kwa sang'hano zawo zihile,

mbali muna iifa wanhu wotenda mbuli zinogile wopata kimbililo.

33 Ubala wokala muna imizoyo ya wanhu wovimanya,

mbali hazimanyika kwa wabozi.

34 Mbuli zinogile zowenula wanhu wa isi,

mbali uhasanyi wogala chinyala kwa wanhu wose.

35 Mfalume konogelwa na msang'hani mbala,

mbali komuwonela ludoko munhu yotenda mbuli za chinyala.