1 Mwanangu, one kuilaha kumulihila mkaya miyago hela,

one kwika chilagano kwa ichimu cha munhu imwenga,

2 one kuifunga kwa mbuli zako,

na kuinamata na chilagano chako,

3 lelo mwanangu, tenda vino uilegehe,

kwaviya kuiguma muna yamakono ya mkaya miyago,

hita ukainyendenyende kumwake na kumulamba mkaya miyago!

4 Meso yako sekeyakukile,

na ngohe zako sekezifinye.

5 Usulupuke fana mhala viyosulupuka muna yamakono ya munhu yeli kuukala,

fana ndege muna umkono wa munhu yotega mtego.

6 Weye munhu mbwa, ifunze kwa muswa,

zilolese nzila zake upate umanyi.

7 Yeye kabule mulangulizi,

hebu mwimilizi hebu munhu mkulu,

8 mbali koikila ngama lusita lwa zuwa,

koduganya ndiya yake chipindi cha kugobola.

9 Vino weye munhu mbwa, kwizagona mbaka zuwaki?

Vino kwizalamka zuwaki muna zinhongo zako?

10 Gona chidogo, kukila chidogo,

ibetebete makono yako uhumule chidogo.

11 Ivo ungayengaye wako wokwiza fana munhu mbavi,

na kulonda kwako kokwizila kwa kusinhukila fana munhu viyokwingila kubawa muna ikaye.

12 Munhu hafaya chinhu, munhu yehile,

kogenda muna inzila kuno kolonga mbuli za kwagiza.

13 Kofunyiza kwa meso yake, kolonga kwa migulu yake,

kowalagusa wanhu kwa vidole vake,

14 kuno koilunga kutenda mbuli zihile na koilunga kuvwiza muna umoyo wake,

kokong'hela ndwagi siku zose.

15 Munhu fana iyo kezapata ndilo kwa kusinhukiza,

kezanangigwa na habule munhu wa kumtaza.

16 Kuna vinhu sita havilonda Mndewa Mulungu,

vauko vinhu saba vili viyovihila,

17 meso ya magoda na lulimi lulonga uvwizi,

na makono yokoma munhu yelibule ubananzi

18 na moyo wougesa malungilo yehile,

na migulu ihuhile kukimbilila wihi,

19 na msindila wa uvwizi yolonga mbuli za uvwizi,

na munhu yokong'hela mbuli za udelenya kwa wanhu.

20 Mwanangu, yamha ndagilizi za tati yako,

sekeuleke mafundizo ya mami yako.

21 Sekeuzimize mbuli zawo,

na uzifunge muna isingo yako.

22 Hondauhite zizakulongoza, hondaugone zizakukaliza,

uhalamka muna zinhongo zizalonga na weye.

23 Kwaviya ndagilizi zino ni chitasa,

mafundizo yano ni bung'hulo,

na kumzuma munhu ni nzila ya ugima.

24 Zikukalize na muke mwihi,

muladi uyepule na mbuli za kuhembeleza za mwanamke malaya.

25 Moyo wako sekeumelele mate unovu wake,

na meso yake sekeyakunamate.

26 Kwaviya mwanamke malaya kezakutenda uwe ngayengaye,

muke wa munhu imwenga kousepa ugima wako.

27 Vino munhu kodaha kwika kala da moto muna diwambo da munhu imwenga,

na walo jake sekedilungule?

28 Vino munhu kodaha kubojoga makala ya moto,

na migulu yake sekeilungule?

29 Niivo viyeli munhu yombandama muke wa munhu imwenga,

chila munhu yomdalisa muke iyo kezatagusigwa.

30 Munhu mbavi yahabawa kwa ichimu cha nzala,

wanhu hawamwehula.

31 One yahagwiligwa, kolondeka yalihe miyanza saba,

na kezalava chila chinhu chili muna ikaye yake.

32 Mbali mulume yombandama muke yeli siyo wake, iyo mbozi,

yoyose yotenda ivo, koidanganiza mwenyewo.

33 Kezatowigwa na kezapata chinyala,

na chinyala chake chizakuwa cha siku zose.

34 Kwaviya wivu wolamsa ludoko lwa mulume,

nayo hezakuwa na ubazi siku ya kulihiliza.

35 Hezatogola kulihigwa nguku,

na kezayalema maliho, hata yahawa makulu ng'hani.