1 Wanhu wozumigwa miyanza mingi na wang'hali wana mizoyo midala,

wezanangigwa kwa kusinhukila na hawezahona.

2 Wanhu wotenda mbuli zinogile wahatawala, wanhu wamwenga wodeng'helela,

mbali wanhu wotenda mbuli zihile wahatawala, wanhu wamwenga wolongelela.

3 Wabala wowadeng'heleza tati zawo,

mbali wanhu woilumba na malaya wezakwagiza vinhu vawo.

4 Mfalume kogangamiza isi kwa kuhumiza voilondeka,

mbali munhu yohokela lushwa koibananga isi.

5 Wanhu wowatogoza wakaya wayawo muladi wapate chiwolonda,

wotanda nyavu muladi kutega magulu yawo.

6 Wanhu wotenda mbuli zihile wogwiligwa na uhasanyi wawo wenyewo,

mbali wanhu wotenda mbuli zinogile wodaha kwimba na kudeng'helela.

7 Wanhu wotenda mbuli zinogile wolonda ngayengaye wahumizigwe voilondeka,

mbali wanhu wotenda mbuli zihile hawagesa kutenda ivo.

8 Wanhu wowehula wayawo wokong'hela ndwagi muna dibululu,

mbali wabala wohoza ludoko.

9 Wanhu wabala wahahita kuna ichitala na wabozi watatali,

wabozi wokalika na woseka, baho habule mulile.

10 Wanhu wokoma wayawo womwihila munhu yotenda mbuli zinogile,

na wolonda kumkoma munhu goya.

11 Wanhu wabozi wolagusa ludoko lwawo lose,

mbali wanhu wabala woikimilila.

12 Mulangulizi yahamtegeleza munhu mvwizi,

vinyandama wake wose wokuwa wahasanya.

13 Ngayengaye na wanhu wowonela woilinga kwa mbuli ino,

Mndewa Mulungu kawatenda wose wadahe kulola.

14 One mfalume yahawahumiza ngayengaye voilondeka,

chigoda chake cha chifalume chizagangamizigwa siku zose.

15 Balati na kuzumigwa vogala ubala,

mbali wana hawalamuligwa wowaguma chinyala mami zawo.

16 Wanhu wotenda mbuli zihile wahongezeka na uhasanyi wokongezeka,

mbali wanhu wotenda mbuli zinogile wezalola wanhu wawo viwonangigwa.

17 Uwalamule wanago muladi ukale moyo hole,

na wezakutenda udeng'helele.

18 Hanhu helibule ulotezi, wanhu woleka kuikimilila,

mbali wamweda wanhu wozindilila malagilizo.

19 Haidahika msang'hani kulamuligwa kwa mbuli muhala,

kwaviya kavimanya mbali hezategeleza.

20 Uhawawona wanhu wohanja,

wanhu wabozi wana muhavu kufosa wawo.

21 Munhu yahamnyeng'hemeza msang'hani wake kwandusila yang'hali mbwanga,

hamwande msang'hani iyo kezamtenda yagaye.

22 Wanhu weli na ludoko wokong'hela ndwagi,

na wanhu weli na ng'hasiliki wotenda uhasanyi.

23 Magoda ya wanhu yowagalila chinyala,

mbali wanhu woinyendanyenda wezahishimigwa.

24 Munhu yoilumba na mbavi kokuwa mwihi wa muhe wake mwenyewo,

na halonga ukweli kuna ichitala.

25 Kuwadumba wanhu ni kwiitegela mtego wenyewo,

mbali wanhu womuhuwila Mndewa Mulungu wezakala moyo hole.

26 Wanhu wengi wolonda kugesigwa na watawala,

mbali Mndewa Mulungu kowahumiza wanhu voilondeka.

27 Wanhu wotenda mbuli zinogile wowehila wabamanyi,

na wanhu wehi wowehila ng'hani wanhu wotenda mbuli zinogile.