1 Wabozi hawafaya kuhishimigwa,

fana viili haifaya zuwa lusita lwa mvula na mvula lusita lwa kugobola.

2 Kuduwiligwa hakumpata munhu bila chimu,

fana chinega viyoguluka bila kwima.

3 Balati kwa falasi, zabi kwa chihongwe,

na balati muna imigongo ya wanhu wabozi.

4 Sekeuwedike wanhu wabozi kwa ubozi wawo,

muladi sekeulinge fana wawo.

5 Wedike wanhu wabozi kwa ubozi wawo,

buleivo wezaiwona wabala.

6 Kuwatuma wasenga wabozi,

kulinga fana kuudumula umgulu hebu kuja daka.

7 Simwe muna imilomo ya wanhu wabozi,

zilinga fana migulu ya mbetembete.

8 Kuwahishimu wanhu wabozi,

kulinga fana kwika mbwewe muna ing'humbwewe.

9 Simwe muna imilomo ya wanhu wabozi,

zilinga fana miwa muna yamakono ya wanhu wakoligwe.

10 Wanhu woweng'ha sang'hano wanhu wabozi,

walinga fana wanhu wopigisa upinde wolumiza chakachaka.

11 Wanhu wabozi wobwelela ubozi wawo,

walinga fana zimbwa vizija madesi yawo.

12 Wanhu wabozi wodaha kuhuwila ng'hani kufosa wanhu woiwona wabala.

13 Wanhu wabwa wolonga, "Mzila muna simba,

simba mkali kozunguluka muna zikaye."

14 Wanhu wabwa woihindula muna yamakomwa yawo,

walinga fana lwivi voluhinda na voluvuguka.

15 Wanhu wamwenga wabwa ng'hani,

mbaka hawadaha kuja wenyewo.

16 Wanhu wabwa woiwona kuwa wabala,

kufosa wanhu saba wokwidika kwa umanyi.

17 Munhu yokwingilila ugomvi si wake,

kalinga fana munhu yomwamha magutwi imbwa yofosa.

18 Fana mtachichala viyodalila miwenge ya moto hebu misale ikoma,

19 niivo viyeli munhu yomvwizila miyage na kulonga, "Nikala nokwinzikila."

20 One habule ngodi moto wozimika,

na ugomvi womala one habule munhu wa kukong'hela.

21 Wanhu weli na ndwagi wokong'hela ndwagi,

walinga fana wanhu wokongeza makala muna yamakala yokwaka na ngodi muna umoto.

22 Mbuli za wadesi zilinga fana ndiya zili mulile,

zokwingila mgati ng'hani mwa lukuli.

23 Wanhu wolonga mbuli zinogile mbali mizoyo yawo iha,

walinga fana langi inogile ihakigwe muna ivia va ulongo.

24 Wanhu wowehila wamwenga wofisa wihi muna imilomo yawo,

mbali muna imizoyo yawo wofisa uvwizi.

25 Wahalonga mbuli zinogile sekeuwahuwile,

kwaviya muna imizoyo yawo wogesa mbuli zihile nyingi.

26 Lungilo jawo da kuwatenda vihile wanhu wamwenga dofisigwa na uvwizi,

mbali mbuli zawo zihile zizalagusigwa hana umting'hano.

27 Wanhu wahahimba kombo wezakwingila umo,

wanhu wahabimbilisa dibwe dizawabwelela na kuwahonda.

28 Lulimi lulonga uvwizi lowehila waja louwalumiza,

mulomo wa kuhembeleza kwa uvwizi wonanga.