1 Yano iviya masimwe ya Sulemani,

yoyandikigwe na wanhu wa Hezekia mfalume wa isi ya Yuda.

2 Mulungu kotogozigwa kwaviya kovimanya mbuli hazimanyika kwa wanhu,

mbali wafalume wotogozigwa kwa mbuli ziwodaha kufambula.

3 Mizoyo ya wafalume haipekulika,

ilinga fana ulanga viwili uchanyha na isi viili hasi.

4 Segeza unyolodo muna ihela,

muladi muhunzi wa hela yatende chinhu chinogile.

5 Msegeze haulongozi wa mfalume munhu yotenda mbuli zihile,

na chigoda chake cha chifalume chizagangamizigwa kwa kuhumiza voilondeka.

6 Sekeuitogoze mwenyewo haulongozi wa mfalume,

na sekewime hanhu ha walangulizi.

7 Muhavu yakulongele, "Izo kuno uchanyha,"

kufosa kukuguma chinyala hana iwakulu.

Mbuli zouziwone kwa meso yako,

8 sekeulopole kuzigala kuna ichitala.

Kwaviya kwizatenda choni kuuhelelo,

one msindila wako yahakuguma chinyala?

9 Uhaibishila na miyago,

sekeumulongele munhu imwenga mbuli imuibishile,

10 buleivo munhu yohulika kezakuguma chinyala,

na chinyala icho hachizamala.

11 Mbuli ilongigwa kwa lusita lufaya,

ilinga fana mahambo ya zahabu muna ichiya cha hela.

12 Muhavu kuzumigwa na munhu mbala,

kufosa heleni na hambo da zahabu inogile.

13 Msenga yokwaminika komdeng'heleza ija yamtumile,

fana mazi yozizima lusita lwa vuke.

14 Munhu yoitogola kwa vitumetume havilava,

kalinga fana mawingu na beho dilibule mvula.

15 Uhafunya umoyo kodaha kumtenda mtawala yatogole,

mbuli zinogile zodaha kugalula magesa ya munhu yolema kutegeleza.

16 One uhapata uki, diya wa kukufaya,

uhaja ng'hani kwizadeka.

17 Sekewingile muna ikaye ya mkaya miyago chila lusita,

muladi sekeyakulegele na kukuwonela ludoko.

18 Munhu yomulavila usindila wa uvwizi mkaya miyage,

kalinga fana lungu na panga na msale ukutwa.

19 Kumuhuwila munhu yeli siyo mwaminika uhawa muna uuzidilwa,

kulinga fana kuhuwila zino diwolile hebu mgulu usiguke.

20 Munhu yomwimbila munhu yafile moyo,

kalinga fana munhu yohambula mawalo yake siku ya mbeho,

na kalinga fana siki itiligwe muna ichilonda.

21 One mwihi wako yahawa na nzala, mwing'he ndiya,

na yahawa na ng'hilu, mwing'he mazi.

22 Kwa kutenda vino, komuhalila munhu iyo makala ya moto muna iditwi jake,

nayo Mndewa Mulungu kezakugweka.

23 Lulimi lulonga udelenya volugala ludoko,

lulinga fana beho da kasikazi vodigala mvula.

24 Muhavu kukala kuna ichisuwili cha kaye,

kufosa kukala kaye imwe na muke yeli na ndwagi.

25 Mbuli inogile yoilawa kuna iisi ya kutali,

ilinga fana mazi ya mbeho kwa munhu yeli na ng'hilu.

26 Munhu yotenda mbuli zinogile viyohumigwa na wihi,

kalinga fana nzasa itibuligwe hebu chisima chili na mazi yatibuke.

27 Havinogile kuja uki mwingi ng'hani,

na havinogile kulonda kutogozigwa.

28 Munhu hadaha kuikimilila mwenyewo,

kalinga fana bululu dilibule wakalizi.