1 Mwanangu, tegeleza mbuli zangu,

na uzindilile ndagilizi zangu.

2 Zindilila ndagilizi zangu muladi uwe mgima,

kaliza mafundizo yangu fana mwana ziso jako.

3 Zifunge muna umkono wako,

na zandike muna umoyo wako.

4 Ulonde mbuli za ubala fana viumulonda mwali wako,

ulonde umanyi fana viumulonda ndugu yako.

5 Zizakukaliza na mwanamke mgoni,

zizakukaliza na mwanamke malaya yokuhembeleza kwa mbuli zake zinogile.

6 Siku dimwe vinikalile muna ikaye yangu, nima hana dizonzo,

nisungulila kunze.

7 Niwawona wabwanga wengi hawavimanyile,

mbwanga imwe kakala mbozi ng'hani.

8 Kakala yofosa habehi na chingolobweda cha kaye ya mwanamke malaya,

kohita kuna ikaye yake.

9 Ikala imingilo, zuwa doswa,

ichilo chikulu.

10 Baho mwanamke iyo kalawa kumuhokela,

kuno kaiyawala fana malaya na kailungila uvwizi.

11 Kana gubu na mtatali,

hahumula hakaye yake.

12 Lusita lumwenga kokuwa kuna dikulugumbi,

lusita lumwenga kokuwa kuna ulubuga,

kozebwegela chila ubanzi kosepa mulume.

13 Komuhagata mbwanga iyo na komnonela,

iviya komulongela bila ya chinyala,

14 "Ninazo nyama za nhambiko yonilavile,

diyelo nifikiza vilaho vangu.

15 Nikuzahila na nikuwona,

ivo niza kuiting'hana na weye.

16 Nitandika goya komwa jangu,

kwa migolole ya chitani ilawile Misili ili na langi zinogile.

17 Komwa jangu nidimizila mavuta yonung'hila goya,

manemane na udi na mdalasini.

18 Izo chikagone mbaka imitondo,

chideng'helele ulondo muna imizoyo yetu.

19 Kwaviya mulumangu kahabule hakaye,

kahita mwanza wa kutali.

20 Kasola mfuko wake wa hela,

na kezabwela mwezi uhakangala."

21 Kamulongela mbuli za kumdeng'heleza,

kamuhembeleza kwa mbuli zake zinogile.

22 Baho kamsondelela muke iyo,

fana viya ng'ombe viyohita kuchinjigwa,

hebu mbozi viyofungigwa mhingu,

23 mbaka msale umuhome ini jake,

fana ndege viyohita kuna umtego,

bila kuvimanya kuwa kezakufa.

24 Lelo wabwanga zangu, kingeni digutwi mnhegeleze,

muzamhe mbuli zonilonga.

25 Mizoyo yenu sekeisondelele nzila za mwanamke iyo,

na sekemuuwegele hanhu hoyafosile.

26 Kwaviya kawabananga wengi,

na kawachinja wengi.

27 Kaye ya muke iyo ni kulugumbi dodisonhela kuzimu,

yohulumukila kuna iifa.