1 Aguli mwana wa Yake kolonga mbuli zino,

kowalongela mbuli zino Isieli na Ukali,

2 "Kweli na mbozi kufosa wanhu wose,

na nabule umanyi wa chiunhu.

3 Siifunzile ubala,

na simmanyile Mulungu yelile.

4 Yelihi yakwelile kuulanga na kuhulumuka?

Yelihi yokunzagiza beho kwa makono yake?

Yelihi yafungile mazi muna diwalo jake?

Yelihi yagangamize mhaka za isi?

Yeye kotangigwa vilihi na mwanage kotangigwa vilihi?

One uhavimanya nilongele!

5 Chila mbuli ya Mulungu yofaya,

yeye kalinga fana kingilo kwa waja womkimbilila.

6 Sekeongeze mbuli muna zimbuli zake,

buleivo kezakulamula na kukulagusa kuwa kwamvwizi.

7 Weye Mndewa Mulungu, nikupula vinhu vidi,

sekeunime ning'hali sinadanganika.

8 Unisegezele uvwizi,

sekeunitende niwe ngayengaye hebu tajili,

mbali uning'he ndiya yangu ya chila siku.

9 Buleivo nizakuwa na vinhu vingi na kukuleka na kulonga, ‘Mndewa Mulungu iyo yelihi?’

Iviya nizakuwa ngayengaye na kubawa,

na kudiguma chinyala zina da Mulungu wangu.

10 Sekeumulongeleze msang'hani kwa mwenevale wake,

muladi sekeyakuduwile na uwoneke kubananga.

11 Kuna wanhu wowaduwila tati zawo,

na wanhu hawawatemela mate mami zawo.

12 Wanhu woigesa kuwa wela

mbali hawanasafyigwa.

13 Kuna wanhu wamwenga wadugi,

wokwehula chila chinhu.

14 Kuna wanhu wamwenga meno yawo yalinga fana mapanga

na saya zawo zikigwa myele,

muladi kuwagegeda ngayengaye muna iisi,

na kuwananga wanhu wolonda kutazigwa.

15 Luba kana wandele waidi, wolonga, ‘Ning'he,’

Kuna vinhu vimwenga haviguta,

kuna vine havilonga, ‘Yofaya.’

16 Vinhu ivo votangigwa kuzimu na munda wa mwanamke heleka,

na isi haimema mazi,

na moto haulonga, ‘Yofaya.’

17 Munhu yahamzeha tati yake,

na kwehula kumtegeleza mami yake,

mahowe wa kudikolongo wezamdomola yameso,

na kezadigwa na masumula.

18 Kuna vinhu vimwenga vonyazanya ng'hani,

na kuna vine sivimanyile.

19 Vinhu ivo votangigwa ugenzi wa masumula kuulanga,

na ugenzi wa nyoka muna uluwe,

na ugenzi wa meli muna ibahali ng'hulu,

na ugenzi wa munhu yeli hamwe na mhambe.

20 Uno uwo ugenzi wa muke mzinzi,

koibandama na mulume, maabaho kokoga,

na kolonga, ‘Sitendile mbuli yoyose ihile.’

21 Isi yogudemeka kwa mbuli zimwenga,

kweli haidaha kuvifunyila umoyo vinhu vine.

22 Vinhu ivo votangigwa mtumwa yokuwa mfalume,

na mbozi yokwiguta ndiya,

23 na muke halondigwa voyosoligwa,

na msang'hani wa chike viyosola hanhu ha mwenevale wake wa chike.

24 Kuna vilumbe vidodo vine muna iisi,

mbali vibala ng'hani.

25 Sungusungu ni vilumbe weli na nguvu ndodo,

mbali woikila ngama ya ndiya lusita lwa zuwa kali.

26 Ng'hulumbe ni vilumbe weli na nguvu ndodo,

mbali woizengela kaye zawo kuna imiluwe.

27 Nzige wabule mfalume,

mbali wogenda hamwe kwa vibumbila.

28 Kodaha kumwamha golombela,

mbali kopatika muna zikaye za chifalume.

29 Kuna vilumbe vimwenga vihagenda voguma mulile,

kuna vine vogenda kwa magoda.

30 Vilumbe ivo ni simba yeli hadumba chochose na kana nguvu kufosa wanyama wose,

31 na nzogolo yogenda kwa kuigoda,

na bebelu da luti,

na mfalume hamwe na wanhu wake.

32 Uhatenda ubozi na kuinula mwenyewo,

hebu one uhagesa mbuli zihile,

gubika mulomo wako kwa mkono.

33 Kwaviya wanhu wahatingisa maziwa muna inyhupa wopata siagi,

na wahamtowa munhu muna imhula kolawa damu,

ivo wokong'hela ludoko wolawilila ndwagi."