1 Muhavu uje gate dinyalile kuno moyo uhola,

kufosa kukala kaye ya dugila ili na ndwagi.

2 Msang'hani mbala kezamtawala mwana yoguma chinyala,

na kezahazi hamwe nayo fana ndugu yake.

3 Zahabu na hela vosunhigwa muna umoto,

mbali Mndewa Mulungu koisafya mizoyo ya wanhu.

4 Wanhu wotenda mbuli zihile wotegeleza uvwizi,

wavwizi wotegeleza ng'hani mbuli zihile zilongigwa.

5 Wanhu wowaseka ngayengaye womuliga mulumbaji wawo,

na wanhu wodeng'helela ndilo wezatagusigwa.

6 Walala woigodela wazukulu zawo,

na wana woigodela tata na mama.

7 Mbuli zinogile hazifaya muna imilomo ya wabozi womwehula Mulungu,

iviya mbuli za uvwizi hazifaya muna imilomo ya watawala.

8 Wanhu wolava lushwa woiwona fana mhinga yawo,

wohuwila kuwa wodaha kutenda mbuli yoyose iwolonda.

9 Wanhu wolekelela uhasanyi wogangamiza ulondo,

mbali wanhu wobwelela kubananga wowagola mbwiya wa habehi.

10 Kuwakalikila wanhu wovimanya kofaya ng'hani,

kufosa kuwalanha wabozi miyanza gana.

11 Wanhu wotenda mbuli zihile wolonda kumuleka Mulungu,

ivo msenga msede kezatumigwa kumwawo.

12 Muhavu uiting'hane na dubu zike yoyahokigwe wanage

kufosa kuiting'hana na wabozi muna uubozi wawo.

13 Wihi hawizasegela muna zikaye za wanhu woliha mbuli zihile kwa mbuli zinogile.

14 Kwandusa ndwagi kulinga fana kutobola nzokwe za mazi,

ivo lekeni ndwagi izo ing'hali hamunaisovula.

15 Kuwapeta wanhu wotenda mbuli zihile kuwa watenda mbuli zinogile,

na kuwatagusa wanhu wotenda mbuli zinogile,

Mndewa Mulungu kowehila wawo wose.

16 Hela haiwafaya wabozi,

kwaviya hawalonda ubala.

17 Mbwiya kolonda siku zose,

na ndugu kelekigwa muladi kutaza siku za magayo.

18 Wabozi woilaha kuwalihila wanhu wamwenga,

na kuwekila chilagano wakaya wayawo.

19 Wanhu wolonda ndwagi wolonda uhasanyi,

na wanhu woigoda wozahila kunangigwa.

20 Wanhu watatali hawezapata mbuli zinogile,

na wanhu wolonga uvwizi wogaya.

21 Wana wabozi wogala lugano,

na tata za wana wabozi hawadeng'helela.

22 Moyo usangalale ni dawa,

mbali moyo unyululuka wonyaza mavuha.

23 Wanhu wotenda mbuli zihile wotogola lushwa,

muladi kwagiza nzila igoloke.

24 Wanhu wovimanya wolola ubala,

mbali meso ya wabozi yozunguluka mbaka kuna uhelelo wa isi.

25 Wana wabozi ni usungu kwa tati zawo,

na kwa mami zawo waweleke.

26 Havinogile kuwaja nguku wanhu welibule ubananzi,

na havinogile kuwalanha wakulu kwa sang'hano zawo zinogile.

27 Wanhu weli na nzewele hawalonga bila kugesa,

iviya wanhu wovimanya wolonga mbuli zawo kwa kuteganya.

28 Hata wabozi watatali wahanyamala wowoneka wabala,

na wanhu weli na umanyi wozikimilila ndimi zawo.