1 Moyo wa mfalume wokuwa muna umkono wa Mndewa Mulungu,

kouhindula kokose koyolonda fana mfulunda wa mazi.

2 Wanhu wowona chiwosang'hana chinoga,

mbali Mndewa Mulungu kolinga mizoyo ya wanhu.

3 Kutenda mbuli zinogile na voilondeka,

vomnogeza Mndewa Mulungu kufosa nhambiko.

4 Meso ya utatali na moyo wa magoda,

volagusa uhasanyi wa wanhu wotenda mbuli zihile!

5 Malungilo ya wanhu woiyoha yowatenda wapate vinhu vingi,

mbali wanhu wotenda himahima wezakuwa ngayengaye.

6 Vinhu vipatike kwa kulonga uvwizi

vilinga fana kungugu dodifosa himahima na mtego ukoma.

7 Wanhu wotenda mbuli zihile wezanangigwa kwa ichimu cha udugi wawo,

kwaviya wolema kutenda voilondeka.

8 Nzila za wahasanyi zaga,

mbali sang'hano za wanhu wotenda mbuli zinogile zigoloka.

9 Muhavu kukala kuna ichisuwili cha kaye,

kufosa kukala kaye imwe na muke yeli na ndwagi.

10 Wanhu wehi wowolonda ng'hani kutenda mbuli zihile,

hawawawonela ubazi wakaya wayawo.

11 Uhawatagusa wanhu wolonga ugongo, wanhu hawavimanyile wezapata ubala,

uhawafunza wanhu wabala, wezadaha kuvimanya.

12 Mulungu kozimanya mbuli zitendeka muna zikaye za wanhu wotenda mbuli zihile,

nayo kezawananga.

13 Wanhu wahasita magutwi yawo muladi sekewawahulike ngayengaye viwolila,

nawo wezalila na hawezategelezigwa.

14 Chitumetume chilavigwa kwa mvisa chohunguza ludoko,

na lushwa ifisike yokomeleza ludoko.

15 Kuhumizigwa ni deng'ho da wanhu wotenda mbuli zinogile,

mbali kowadumbiza wanhu wotenda mbuli zihile.

16 Wanhu wokwaga kulawa muna inzila ya ubala,

wezakala hamwe na wanhu wadanganike.

17 Wanhu wolonda madambwa wezakuwa ngayengaye,

wanhu wolonda upele na mavuta ya zaituni, hewezakuwa matajili.

18 Wanhu wotenda mbuli zihile wezagaya badala ya wanhu wotenda mbuli zinogile,

na wanhu weli siyo waminika wezatagusigwa badala ya wanhu wotenda voilondeka.

19 Muhavu kukala muna dibwilingu,

kufosa kukala na muke mtatali yeli na ndwagi.

20 Wanhu wabala wokwika ngama ya ndiya na mavuta ya zaituni,

mbali wanhu wabozi wogegeda vinhu vose viwelinavo.

21 Wanhu woiyoha kutenda mbuli zinogile na kuwalonda wayawo,

wezahishimigwa na wezakala siku nyingi na wezapata vinhu viwolonda.

22 Wanhu wabala wodaha kuditowa bululu da wanhu weli na nguvu,

na kuzigwisa mhongono zowozihuwila.

23 Wanhu wokaliza milomo yawo na ndimi zawo woikaliza na magayo.

24 Wanhu watatali weli na magoda wotangigwa wakewezi,

na wotenda mbuli za magoda.

25 Wanhu wabwa wezakomigwa na nzala,

kwaviya hawalonda kusang'hana usang'hano.

26 Wabwa womelela mate siku zose,

mbali wanhu wotenda mbuli zinogile wolava kwa makono maidi.

27 Mndewa Mulungu kokwihila nhambiko za wanhu wotenda mbuli zihile,

zozilavigwa kwa lungilo dihile.

28 Wasindila wa uvwizi wezanangigwa,

mbali wanhu wohulika wezalonga mbuli zozikala.

29 Wanhu wotenda mbuli zihile woitenda wanoga,

mbali wanhu wotenda mbuli zinogile wogesa nzila zawo.

30 Ubala na umanyi na malungilo ya wanhu, havizadaha kuihuma na Mndewa Mulungu.

31 Falasi wosasaligwa kwa ng'hondo,

mbali uhumi walawa kwa Mndewa Mulungu.