1 Wanangu, tegelezeni niye tati yenu vonimfunzani,

kingeni digutwi mupate kuvimanya.

2 Kwaviya nomfunzani vinogile,

sekemuzimize mbuli zangu.

3 Vinikalile mbwanga mdodo muna ikaye ya tati yangu,

vinikalile ching'hele na mwana niidumwe kwa mami yangu,

4 tata kanifunza, kanilongela,

"Yamha mbuli zangu zose kwa moyo wako wose,

zindilila ndagilizi zangu muladi uwe mgima.

5 Iyohe uifunze ubala na uwe na umanyi,

sekeuzimize mbuli zangu na sekeuzileke.

6 Uhazindilila mbuli zangu za ubala, zizakukaliza,

uzilonde, nazo zizakwamila.

7 Habule chinhu chikulu kufosa ubala,

kweli, lava vinhu vako vose upate umanyi.

8 Ugese mbuli za ubala na kwizahishimigwa,

uzamhe na kwizatogozigwa.

9 Wanhu vondawahulike mbuli zako za ubala wezakutogoza."

10 Mwanangu, tegeleza na utogole mbuli zonikulongela,

muladi ukale miyaka mingi.

11 Nogendelela kukulongoza muna inzila ya ubala,

Nogendelela kukulongoza muna zinzila zigoloke.

12 Uhagenda, magulu yako hayezakimililigwa,

na uhakimbila, hwizaikwala.

13 Yamha mafundizo, sekeuyaleke yapulusuke,

uyazindilile muladi uwe mgima.

14 Sekeutende fana viwotenda wanhu wotenda mbuli zihile,

na sekeuwahige wanhu wehi.

15 Sekeutende fana viwotenda na uyepule nawo,

uwafose na ugendelele.

16 Kwaviya wawo hawagona mbaka watende wihi,

hawapata nhongo mbaka wambanange munhu.

17 Wolonda kutenda wihi fana viwolonda kuja ndiya,

wolonda usede fana viwolonda ching'waji.

18 Mbali ugenzi wa wanhu wotenda mbuli zinogile ulinga fana mhwani yau,

yoibung'hula ng'hani mbaka imisi.

19 Ugenzi wa wanhu wotenda mbuli zihile ulinga fana ziza,

hawavimanyile chinhu chochiwatenda wagwe.

20 Mwanangu, tegeleza vinogile mbuli zangu,

kinga digutwi utegeleze chiya chinilonga.

21 Sekeuleke zisegele kumwako,

uzike goya muna umoyo wako.

22 Kwaviya mbuli izo ni ugima kwa waja wozipata,

na dawa kwa ng'huli zawo zose.

23 Kaliza moyo wako kufosa vinhu vose voukaliza,

kwaviya umo molawa ugima.

24 Sekeulonge mbuli zihile,

uyepule na mbuli hazifaya.

25 Meso yako yalole kuulongozi wako,

lola kuulongozi wako dimwe kwa dimwe.

26 Kuluga hanhu houfosa,

nzila zako zose zigangamale.

27 Sekeubaguke ukulume hebu ukumoso,

uyepule mgulu wako kuna uwihi.