1 Tegelezeni mbuli za ubala,

umanyi ulinga fana mwanamke yowatanga wanhu wamtegeleze.

2 Mwanamke iyo kokwima uchanyha ya milima habehi na nzila,

kokwima hana inzila mhanda.

3 Kokwima habehi na nyivi za kwingilila muna dibululu,

kotanga kwa dizi kulu,

4 "Mweye walume, nomtangani,

nowalandulila dizi jangu wanhu wose.

5 Mweye wabozi, ifunzeni kuwa na nzewele,

kingeni digutwi, mweye hamvimanyile.

6 Tegelezeni kwaviya nina mbuli ng'hulu za kulonga,

nonamula mulomo wangu na nomulongelani mbuli zigoloke.

7 Nizalonga ukweli muhala,

nowihila wihi.

8 Mbuli zose zonilonga zigoloka,

habule mbuli ihile hebu ya uvwizi.

9 Kwa wanhu wovimanya, mbuli zangu zomanyika,

kwa wanhu weli na nzewele, mbuli zangu zigoloka.

10 Sagula mafundizo yangu badala ya hela,

sagula umanyi badala ya zahabu inogile.

11 Kwaviya kuwa na ubala kunoga kufosa mabwe ya hela nyingi,

na chochose chouchilonda hachiilinga na ubala."

12 Ubala ulinga fana munhu yolonga, "Niye nokala hamwe na nzewele,

novimanya na nosagula vinogile.

13 Kumdumba Mndewa Mulungu ni kuwihila wihi,

niye nokwihila utatali na magoda,

nokwihila mbuli za chinyala.

14 Nodaha kulava magesa yanogile kwa munhu na kulamula,

novimanya na nina nguvu.

15 Nowataza wafalume kutawala,

na walangulizi kulagiliza voilondeka.

16 Nowataza walangulizi kulanguliza,

nowataza watawala na wasemi wose.

17 Nowalonda waja wonilonda,

waja wonizahila niye wezaniwona.

18 Nina utajili na hishima,

nina utajili wa siku zose na unovu.

19 Tunda jangu dinoga kufosa zahabu inogile,

chinhu chonilava chinoga kufosa hela inogile.

20 Nogendelela kutenda mbuli zinogile na zigoloke,

21 na noweng'ha utajili waja wonilonda,

nizamemeza ngama zawo.

22 Mndewa Mulungu kanilumba mwanduso wa sang'hano zake,

kanilumba yang'hali hanakwandusa sang'hano zake za umwaka.

23 Nisaguligwa kwandusila umwaka,

nisaguligwa isi ing'hali hainalumbigwa.

24 Nivumbuligwa ing'hali vilindi va mazi havinakuwa uko,

kukala kwabule nzasa za mazi.

25 Nivumbuka ing'hali milima hainagangamizigwa,

nivumbuka ing'hali vilima havinakuwa uko.

26 Nivumbuka Mulungu yang'hali hanalumba isi na migunda na timbwisi da isi.

27 Nikala uko lusita ulanga viulumbigwe,

viyagolile ulanga na bahali.

28 Nikala uko viyalumbile mawingu yeli uchanyha,

viyatobole nzasa za mazi.

29 Nikala uko viyekile mhaka ya bahali,

muladi mazi yake yazindilile lagilizo jake,

nikala uko viyalumbile vandusilo va isi.

30 Nikala hamwe nayo fana mwana mdodo,

nimemezigwa deng'ho chila siku,

siku zose nideng'helela haulongozi wake.

31 Nideng'helela isi iwokala wanhu,

niwadeng'helela wanhu.

32 Lelo wanangu nitegelezeni,

watemeligwa mate wanhu waja wosondelela mbuli zangu.

33 Tegelezeni mafundizo yangu muladi muwe na ubala,

na sekemuyaleme mafundizo yayo.

34 Watemeligwa mate waja wonitegeleza,

wogozela siku zose muna zinyivi zangu,

wogozela hana ivizingiti vangu.

35 Kwaviya wanhu woniwona niye wowona ugima,

nawo wezatogoligwa na Mndewa Mulungu.

36 Mbali wanhu wonipuwa niye woinanga wenyewo,

na wose wonihila niye wolonda ifa."