1 Sekeuwawonele migongo wanhu wotenda mbuli zihile,

sekeulonde kuihanganya nawo,

2 kwaviya mizoyo yawo yogesa utatali,

na milomo yawo yolonga mbuli zozigala magayo.

3 Kaye yozengigwa kwa ubala,

na yogangamizigwa kwa umanyi,

4 na viheleto vake vomemezigwa kwa umanyi,

vomemezigwa vinhu va hela nyingi na vonogeza.

5 Wanhu wabala wana udahi mkulu,

wanhu wovimanya wokongeza nguvu.

6 Ung'hali hunakwandusa ng'hondo kolondeka ugese ng'hani,

na hudaha kuhuma bila kupata magesa yanogile ya wanhu wamwenga.

7 Ubala haupatika kwa wabozi watatali,

na wabule mbuli za kulonga hana umting'hano.

8 Wanhu wogesa kutenda mbuli zihile,

wezatangigwa waselesi.

9 Wanhu wabozi wogesa kutenda uhasanyi,

wanhu wowehila waja wokwehula.

10 Uhabeneka moyo muna yamagayo,

nguvu zako ndodo!

11 Wakombole waja wosoligwa kukomigwa,

uwalopole waja wohita kudumuligwa yamatwi.

12 One uhalonga, "Sivimanyile chochose,"

vino Mulungu yolola muna imizoyo havimanyile?

Vino Mulungu yokaliza ugima wenu havimanyile?

Vino hezamuliha chila munhu kwa chiya chiyasang'hane?

13 Mwanangu, diya uki kwaviya unoga,

uki ulawa muna dilala wamulile.

14 Iviya uvimanye kuwa ubala unoga fana uki kumwako.

One uhapata ubala kuna huwilo da siku zikwiza,

na huwilo jako hadizalemigwa.

15 Sekeusepe fana viyotenda mbavi muladi kumbawila munhu yotenda mbuli zinogile,

sekeubanange kaye yake.

16 Kwaviya wanhu wotenda mbuli zinogile wogwa miyanza mingi na wokwinuka kaidi,

mbali wanhu wotenda mbuli zihile wogwisigwa na wonangigwa.

17 Mwihi wako yahagwa, sekeudeng'helele,

na one yahaikwala, moyo wako sekeusekelele.

18 Buleivo Mndewa Mulungu kezawona na hezanogelwa,

kezaleka kumuwonela ludoko.

19 Sekeudumbe kwa ichimu cha wanhu wehi,

iviya sekeuwawonele migongo wanhu wotenda mbuli zihile,

20 kwaviya wawo wabule huwilo da siku zikwiza,

wezadanganika fana vitasa vovizimigwa.

21 Mwanangu, uwadumbe Mndewa Mulungu na mfalume,

na sekeuihanganye na wanhu wolema kutegeleza,

22 kwaviya wezanangigwa kwa kusinhukila.

Vino yelihi yodimanya hulo dondawagale Mulungu na mfalume?

23 Zino iviya mbuli za wanhu wabala.

Havinogile kuhumiza kwa kuwonela.

24 Munhu yoyose yomulongela mbananzi, "Weye kwabule ubananzi,"

wanhu wezamduwila na wanhu wa zisi zimwenga wezamwihila.

25 Mbali wanhu wondawawataguse wabananzi wezadeng'helela,

na Mulungu kezawatemela mate.

26 Kwidika voilondeka kolagusa umbwiya wa kweli.

27 Komeleza sang'hano zako za kunze,

sasala migunda yako,

uhakomeleza kutenda ivo, zenga kaye yako.

28 Sekeumulongeleze miyago kwa mbuli haitendile,

iviya sekeulonge uvwizi.

29 Sekeulonge, "Nizamtendela fana viyanitendele,

nizamuliha kwa chiya chiyanitendele."

30 Nifosa habehi na mgunda wa munhu mbwa,

habehi na mgunda wa mizabibu wa munhu mbozi.

31 Mgunda wose umema miwa,

ugubikigwa na masinde,

na ng'huta yake ya mabwe igwa.

32 Muna umoyo wangu nigesa mbuli ija yoniiwone,

iviya niifunza mbuli kwa icho choniwone.

33 Gona chidogo, kukila chidogo,

ibetebete makono yako uhumule chidogo.

34 Maabaho ungayengaye wokwizila fana mbavi,

na kuhungukilwa kokwizila kwa kusinhukila fana munhu viyokwingila kubawa muna ikaye.