1 Wanhu woilunga muna imizoyo yawo mbuli ya kulonga,

mbali Mndewa Mulungu koweng'ha mbuli za kulonga.

2 Wanhu wowona nzila zawo zinoga,

mbali Mndewa Mulungu kolinga mihe ya wanhu.

3 Muhuwile Mndewa Mulungu kwa chila chiulonda kutenda,

na chila chiuilungile chizatendeka.

4 Mndewa Mulungu kotenda chila chinhu fana viyailungile,

hata wanhu watenda mbuli zihile kwa siku ya kunangigwa.

5 Mndewa Mulungu kowehila wanhu weli na mizoyo ya magoda,

kweli hezaleka kuwatagusa.

6 Uhasanyi wosegezigwa kwa ulondo wa kufunya umoyo na uwaminika,

wanhu woyepula kutenda mbuli zihile kwa kumdumba Mndewa Mulungu.

7 Mndewa Mulungu yahanogelwa na ugenzi wa munhu,

kowatenda wehi wake wakale nayo kwa tindiwalo.

8 Muhavu kuwa ngayengaye hamwe na kutenda mbuli zinogile,

kufosa kuwa na vinhu vingi hamwe na kutenda mbuli hazifaya.

9 Wanhu woilunga muna imizoyo yawo,

mbali Mndewa Mulungu niiyo yowalanguliza.

10 Mfalume kolonga kwa kulangulizigwa na Mulungu,

na mulomo wake wohumiza voilondeka.

11 Ningo zigoloke zolawa kwa Mndewa Mulungu,

mabwe yose ya kulingila kayatenda yeye.

12 Wafalume wokwihila kutenda mbuli zihile,

kwaviya chigoda cha chifalume chogangamizigwa kwa kutenda mbuli zinogile.

13 Wafalume wowadeng'helela wanhu wolonga ukweli,

na wowalonda wanhu wolonga mbuli zigoloke.

14 Ludoko lwa mfalume lulinga fana usenga wa ifa,

mbali wanhu wabala wezaluhoza.

15 Chihanga cha mfalume chihasamhuka, kuna ugima,

kulondigwa nayo kulinga fana mvula lusita lwa masika.

16 Ubala unoga kufosa zahabu,

na kuvimanya kunoga kufosa kupata hela.

17 Nzila ng'hulu ya wanhu wotenda mbuli zinogile ni kuyepula na wihi,

wanhu wokaliza nzila zawo wokaliza ugima wawo.

18 Magoda yolongolela kunangigwa,

wanhu woiwona wakulu wolongolela kugwa.

19 Muhavu uwe mnyendanyenda hamwe na wanhu weli ngayengaye,

kufosa kuigolela mateka na wanhu weli na magoda.

20 Wanhu wose wotogola kufunzigwa wamweda,

na wamweda wanhu womuhuwila Mndewa Mulungu.

21 Wanhu wabala wotangigwa wavimanyile,

na mbuli zili mulile zowakwenhusa wanhu habehi.

22 Umanyi ni nzasa ya ugima kwa wanhu wowose welinawo,

mbali wabozi watatali wotagusigwa kwa ubozi wawo.

23 Mizoyo ya wanhu wabala yolanguliza milomo yawo,

na yokongeza umulile muna yamafundizo yawo.

24 Mbuli zinogile zilinga fana sega da uki,

zamulile muna umoyo na zohonya lukuli.

25 Kuna nzila yoiwoneka inoga kwa munhu,

mbali kuuhelelo yogala ifa.

26 Nzala yowatenda wasang'hani waiyohe kusang'hana usang'hano,

kwaviya nzala yawo yowatenda wagendelele.

27 Wanhu wehi wolonda kuwagaza wayawo,

na mbuli zawo zilinga fana moto ulunguza.

28 Wadelenya wokong'hela ndwagi,

na wadesi wowapwililisa wambwiya zawo.

29 Wanhu wokalika wowavwizila wayawo,

na wowalongoza kuna inzila ihile.

30 Wanhu wofunyiza woilungila mbuli zihile,

na wanhu wowang'ong'a wamwenga wogesa kutenda mbuli zihile.

31 Uhenga ni kombelo da ukulu,

dopatika kwa kutenda mbuli zinogile.

32 Wanhu wokalama kupata ludoko wanoga kufosa magalu,

na wanhu wolukimilila ludoko lwawo wanoga kufosa wanhu wosola bululu.

33 Wanhu wotowa mhiya kwa kupigisa vibwe,

mbali Mndewa Mulungu yaidumwe iyo yosagula chiya chondachilawilile.