1 Kuhishimigwa kunoga kufosa kuwa na vinhu vingi,

iviya kunoga kufosa hela na zahabu.

2 Mndewa Mulungu kawalumba wanhu wose, matajili na ngayengaye.

3 Wanhu weli na nzewele wahawona ng'hondo woifisa,

mbali wanhu hawavimanyile wogendelela kuulongozi na ng'hondo iyo yowagaza.

4 Unyendanyenda na kumdumba Mndewa Mulungu,

vogala utajili na hishima na ugima.

5 Zinzila za wanhu wotenda mbuli zihile zimema miwa na mitego,

mbali wanhu wokaliza ugima wawo wokala kutali nayo.

6 Wafunze wana kutenda voilondeka,

nawo hawezaleka kutenda ivo hata wahalala.

7 Matajili wowatawala ngayengaye,

na wanhu wokwazima wokuwa watumwa wa wanhu wawazime.

8 Wanhu wohanda mbuli zihile wezagobola magayo,

na mibalati ya ludoko lwawo izanangigwa.

9 Wanhu wolava kwa makono maidi wezatemeligwa mate,

kwaviya woweng'ha ndiya ngayengaye.

10 Muwinge munhu mkewezi, ndwagi zizamala,

baho maligo na chinyala vizasegela.

11 Wanhu weli na moyo welile na wolonga mbuli za ubazi,

wezakuwa wambwiya wa mfalume.

12 Mndewa Mulungu kowakaliza wanhu wovimanya,

mbali kozilema mbuli za wanhu wavwizi.

13 Munhu mbwa kolonga, "Kunze kuna simba,

nizakomigwa kuna inzila."

14 Mbuli za muke mgoni zilinga fana kombo tali,

wanhu wowoneligwa ludoko na Mndewa Mulungu wezakwingila muna dikombo ijo.

15 Ubozi wamunamumoyo wa chila mwana,

mbali balati da kulamula dizauwinga.

16 Wanhu wowabamanya ngayengaye muladi wapate vinhu vingi,

na wanhu woweng'ha vitumetume matajili, wose wezakuwa ngayengaye.

17 Kinga digutwi utegeleze mbuli za wanhu wabala,

moyo wako uhulike mbuli zonikufunza,

18 kwaviya zonogeza uhazika muna umoyo wako,

na zose uwe nazo muna umulomo wako.

19 Leka diyelo nikufunze,

muladi umuhuwile Mndewa Mulungu.

20 Nikwandikila masimwe malongo matatu,

masimwe ya magesa yanogile na umanyi,

21 muladi uvimanye mbuli za kweli na za kwaminika,

na uhauzigwa udahe kwidika voilondeka.

22 Sekeuwabamanya ngayengaye kwaviya ni ngayengaye,

na sekeuwazehe wanhu wolonda kutazigwa kuna ivitala,

23 kwaviya Mndewa Mulungu kezawagombela,

na kezawahoka ugima waja wowabamanya ngayengaye.

24 Sekeuwe mbwiya wa wanhu wowona ludoko himahima,

na sekewiilumbe na wanhu wahuhile kupata ludoko.

25 One uhaifunza ugenzi wawo,

kwizanamata muna umtego.

26 Sekewike lehani kwa madeni ya wanhu wamwenga,

na sekeuwekile zamana wanhu.

27 One uhawa kwabule chinhu cha kuliha,

komwa jako dizasoligwa lusita vondaugone.

28 Sekeusegeze mhaka ya umwaka

yoikigwe na wasaho zako.

29 Vino kowawona wanhu wosang'hana usang'hano wawo vinogile?

Wawo wezawasang'hanila wafalume,

hawezawasang'hanila wanhu chaka.