1 Mwanangu, sekeuzimize mafundizo yangu,

uyazindilile malagilizo yangu.

2 Malagilizo yayo yezakongezela siku nyingi,

na kwizatemeligwa mate siku zose za ugima wako.

3 Ulondo wa kufunya umoyo na waminika sekeviilekese na weye,

vifunge muna isingo yako,

na uvandike muna umoyo wako.

4 Maabaho kwizatogoligwa na kwizatangigwa munhu yanogile,

haulongozi wa Mulungu na haulongozi wa wanhu.

5 Muhuwile Mndewa Mulungu kwa moyo wako wose,

iviya sekeuhuwile nzewele zako mwenyewo.

6 Chila mbuli youtenda, muleke yeye yakulongoze,

na kezagolosa nzila zako.

7 Sekeugese kuwa weye mbala,

mdumbe Mndewa Mulungu na sekeutende mbuli zihile.

8 Iyo izakutenda ugangamale,

na iyo izakutenda unenehe.

9 Muhishimu Mndewa Mulungu kwa kumwing'ha vinhu vako,

na kumwing'ha malimbulo ya mazao yako yose.

10 Maabaho madungu yako yezamema ndiya,

na ng'hupulilo zako zizamema divai ya sambi.

11 Mwanangu, sekeuleme kulamuligwa na Mndewa Mulungu,

na sekeuleme kuzumigwa nayo.

12 Kwaviya Mndewa Mulungu kowalamula wanhu woyowalonda,

fana viya tata viyomlamula mwanage iyomulonda.

13 Watemeligwa mate wanhu wozahila ubala,

na wamweda wanhu wovimanya mbuli za chila siku.

14 Ubala wofaya kufosa hela,

iviya wofaya kufosa zahabu yelile.

15 Ubala wofaya kufosa mabwe ya hela nyingi,

na vinhu vose vouvilonda havifaya kufosa ubala.

16 Ubala wowatenda wanhu wakale siku nyingi,

na kowatenda wanhu wapate vinhu vingi na wawe na hishima.

17 Nzila za ubala zinoga,

na zogala tindiwalo.

18 Ubala ulinga fana mbiki wouweng'ha wanhu ugima,

na wanhu hawaleka ubala wezadeng'helela.

19 Mndewa Mulungu keka vandusilo va isi kwa ubala wake,

Mndewa Mulungu kagangamiza ulanga kwa umanyi wake.

20 Kwa kuvimanya kwake kayagola mazi,

na mawingu yalagaza mvula.

21 Mwanangu, ugendelele kutenda mbuli zigoloke na ukale kwa ubala.

22 Uhatenda ivo kwizakala vinogile,

na wanhu wezakuhishimu.

23 Baho kwizagenda goya,

na hwizaikwala bule.

24 Vondautambalale, hwizadumba,

Vondaugone, nhongo zako zizakuwa zinoga.

25 Hwizadumba mahulo vondayeze,

na hwizadumba kunangigwa hamwe na wanhu wotenda mbuli zihile.

26 Kwaviya kwizamuhuwila Mndewa Mulungu,

yeye kezaukimila mgulu wako sekeunamate muna umtego.

27 One uhadaha kuweng'ha wanhu vinhu vinogile vowolondeka kupata, sekeuleke kutenda ivo.

28 Sekeumulongele mkaya miyago,

"Bwela igolo nizakwing'ha,"

kuno chinhu icho kunacho habehi.

29 Sekeuilunge kumtendela mbuli zihile mkaya miyago,

yokala habehi na weye na yokuhuwila.

30 One munhu hakutendele mbuli yoyose ihile, sekeumulongeleze.

31 Sekeumuwonele migongo munhu msede,

na sekeutogole kumuhiga.

32 Kwaviya Mndewa Mulungu kowehila wanhu wavwizi,

mbali wanhu wotenda mbuli zinogile wokuwa wambwiya zake.

33 Mndewa Mulungu koziduwila kaye za wanhu wotenda mbuli zihile,

mbali kozitemela mate kaye za wanhu wotenda mbuli zinogile.

34 Iviya kowehula wanhu wowehula wamwenga,

mbali kowawonela ubazi wanhu woinyendanyenda.

35 Wabala wezahishimigwa,

mbali wabozi wezagumigwa chinyala.