1 Ubala ulinga fana muke yazengile kaye yake,

na kasongola mhanda zake saba.*

2 Kasasala nyama yake na kahanganya vilungo na divai,

na kasasala meza yake.

3 Kowatuma wasang'hani wake,

muladi wawatange wanhu kulawa uchanyha ya bululu.

4 Kowalongela wabozi wose,

"Munhu havimanyile yengile muna ikaye yangu.

5 Izo uje ndiya yangu,

na ung'we divai iniihanganye.

6 Leka magesa yako ya ubozi, muladi udahe kuwa mgima,

ifunze muladi upate nzewele."

7 Yoyose yomzuma munhu yotenda ugongo, kohokela maligo,

yomkalikila munhu mwihi kezalumizigwa.

8 Sekeumkalikile munhu yeli na magoda kwaviya kezakwihila,

one uhamkalikila munhu mbala, kezakulonda.

9 Mfunze munhu mbala, nayo kezaiyoha kuvimanya,

mfunze munhu yotenda mbuli zinogile, nayo kezaiyoha kuifunza.

10 Uhalonda kuwa mbala wanduse kumdumba Mndewa Mulungu,

na kummanya Mulungu Yelile ni mwanduso wa umanyi.

11 Kwaviya uhawa mbala, siku zako zizakongezeka

na kwizakongezeligwa miyaka ya kuwa mgima.

12 One uhawa mbala, kwizagwekigwa,

one uhalema ubala, kwizagaya.

13 Mwanamke mbozi kana gubu,

yeye mbunye na hamanya mbuli yoyose.

14 Kokala hana ulwivi lwa kaye yake,

kokala muna ichigoda uchanyha ya bululu,

15 muladi yawatange wanhu wofosa,

wogenda muna inzila yawo.

16 Wanhu hawavimanyile kowalongela,

"Wabozi wose wengile muno!

17 Mazi yabawigwe yamulile,

gate didigwe kwa kwiifisa dinoga ng'hani."

18 Mbali mambunye wawo hawavimanyile kuwa wanhu wadanganike waumo,

kuwa wanhu woyawahokele mwanamke iyo wamuna ivilindi va kuzimu.