1 Yano yayo masimwe ya Sulemani mwana wa Daudi, mfalume wa Isilaili. 2 Masimwe yano yowafundiza wanhu ubala na yowafundiza kuyamanya mafundizo yanogile. 3 Masimwe yano yofaya kuwafundiza wanhu kuigaza muladi watende mbuli zinogile na watende mbuli zigoloke na bila ya kuwonela. 4 Yano yofaya kuwatenda wanhu wabozi hawavimanyile wawe wabala na kuwatenda wabwanga wavimanye na waiteganye. 5 Wabala wategeleze na waiyohe kuvimanya, iviya wanhu weli na nzewele waifunze. 6 Chitabu chino chofaya kuwafundiza wanhu wavimanye simwe na vitendawili na mbuli za wabala na simo.

7 Uhalonda ubala wanduse kumdumba Mndewa Mulungu,

wabozi watatali wolema kuzumigwa na mafundizo.

8 Mwanangu, tegeleza tati yako viyokuzuma,

na sekeuleme mafundizo ya mami yako.

9 Yayo yezakuwa kombelo dinogile muna iditwi jako,

na mkufu wa kuihamba muna isingo yako.

10 Mwanangu, one wahasanyi wahakusongeza, sekeutogole.

11 Wezalonga, "Izo wiilumbe na cheye,

chikawasepe wanhu chiwakome.

Izo chikawasepe wanhu welibule ubananzi.

12 Chiwakome muladi isi iwamele,

wezakuwa fana wanhu waja wohulumuka muna dikombo.

13 Chizasola vinhu vawo vose,

iviya chizamemeza kaye zetu vinhu vichihokile.

14 One uhailumba na cheye,

vinhu vose chizaigolela."

15 Mwanangu, sekeuwasondelele,

na sekeutende viwotenda wawo.

16 Kwaviya migulu yawo yokimbilila kutenda uhasanyi,

wahuha kuwakoma wanhu.

17 Haifaya kutega lwavu, kuno ndege wokuwona,

mtego uwo wotegigwa bule.

18 Mbali wanhu wano woikoma wenyewo,

woisepa wawo wenyewo.

19 Uno niuwo uhelelo wa wanhu wose wopata vinhu kwa nzila haifaya,

wousegeza ugima uweli nawo wenyewo.

20 Ubala ulinga fana muke yotanga kwa dizi kulu muna dikulugumbi,

kolandula dizi jake muna yamabuga.

21 Kolila kuna ulung'husesa lwa wanhu,

kolonga mbuli zake hanhu ha kwingilila muna dibululu.

22 "Mweye hamvimanyile, vino mwizaunanahila ubozi wenu mbaka zuwaki?

Mweye mukwinzikila, vino mwizadeng'helela kwinzikila mbaka zuwaki?

Mweye wabozi, vino mwizakwihila umanyi mbaka zuwaki?

23 Vinimzumani musame,

nizamulongelani chili muumoyo wangu,

na nizamulongelani mbuli zangu.

24 Vinimtangileni mulema kunitegeleza,

na habule yoyose yalolile vinigolose mkono wangu kumtangani.

25 Muzehula mbuli zangu zose zonimulongeleni,

na hamulondile nimzumeni.

26 Vondamugaye, nizamsekani,

vondamudumbe, nizamzehani.

27 Nizamzehani vondayamwizileni magayo na mahulo fana beho kulu,

iviya nizamzehani vondamuzoligwe na ndilo fana vulavumbi,

iviya nizamzehani vondamupatigwe na uzidilwa na manhesa.

28 Baho mwizanitanga, mbali sizamwidikani,

mwizanizahila mbali hamwizaniwona

29 kwaviya mulema kuvimanya,

na hamusagule kumdumba Mndewa Mulungu.

30 Iviya mulema mbuli zangu zose zonimulongeleni,

na hamulondile nimzumeni.

31 Mwizakuja matunda ya nzila zenu,

na mwizavimbilwa na matunda ya ubananzi wenu wenyewo.

32 Kwaviya wabozi wezakomigwa kwa udugi wawo,

na wezanangigwa kwa kwehula nzila zigoloke.

33 Mbali wanhu wose wonitegeleza, wezakala vinogile,

wezakala goya na hawadumba mbuli zihile."