1 Sekeuigodele mbuli zondazilawilile igolo,

kwaviya huvimanyile igolo chizalawilila choni.

2 Leka wanhu wamwenga wakutogoze, mbali siyo weye mwenyewo,

wanhu wamwenga watende ivo, mbali siyo mulomo wako.

3 Dibwe dizama na msanga uzama,

mbali kugumigwa ludoko na wabozi watatali kuzama kufosa vinhu ivo vose.

4 Ludoko ni usede na ng'hasiliki ni mvula ya gombo,

mbali yelihi yodaha kwima haulongozi wa wanhu wowona migongo?

5 Muhavu munhu yokukalikila,

kufosa ulondo uifisile.

6 Mbwiya wahakukalikila wolagusa kuwa wokulonda,

mbali wehi wahakusangalalila kukulamsa wolagusa udelenya.

7 Wanhu wokwiguta hawalonda uki,

mbali wanhu weli na nzala hata chinhu chili usungu wochiwona chamulile.

8 Wanhu wokala kutali na kaye zawo,

walinga fana ndege weli kutali na mvulu zawo.

9 Mavuta na vinhu vinung'hila goya voudeng'heleza moyo,

iviya umbwiya wa munhu wolawa muna yamagesa yake yanogile.

10 Sekeumuleke mbwiyako hebu mbwiya wa tati yako,

iviya uhawa na ndilo sekewingile muna ikaye ya ndugu yako lusita kahabule,

kwaviya muhavu mkaya miyago kufosa ndugu yeli kutali.

11 Mwanangu, uwe mbala muladi udeng'heleze moyo wangu,

maabaho nodaha kumwidika munhu yoyose yonilonga vihile.

12 Wanhu weli na nzewele wahawona ng'hondo woifisa,

mbali wanhu hawavimanyile wogendelela kuulongozi na ng'hondo iyo yowagaza.

13 Sola walo da munhu yomwikila zamana munhu hammanyile,

ujamhilile diwe lehani kwa ichimu cha munhu iyo.

14 One munhu yoyose yahamtemela mate mkaya miyage chilochilo kwa dizi kulu,

izapeteka fana duwilo.

15 Muke yolongelela ulwo kwa ulwo,

kalinga fana madwende ya mvula yogendelela.

16 Kumkimilila ilinga fana kuikimilila mbeho,

na ilinga fana kwamha mavuta muna diganza jako.

17 Munhu koifunza kwa munhu imwenga,

fana viya chuma vichinoligwa na chuma chimwenga.

18 Munhu youlola goya mtini kezakuja matunda yake,

na munhu yomulola goya mwenevale wake kezahishimigwa.

19 Fana voudaha kuwona chihanga chako muna yamazi,

niivo moyo wa munhu womulagusa viyeli.

20 Ifa na kunanga haviguta,

iviya meso ya wanhu hayeguta.

21 Unovu wa hela na zahabu wogezigwa kwa moto,

na wanhu wahatogozigwa womanyika viweli.

22 Hata uhamdunda mbozi mtatali muna dituli,

uhamtwanga na mtoho fana uhule,

hwizasegeza ubozi wake.

23 Iyohe kuyamanya mabumbila yako ya ng'hondolo viyeli,

na kuwalola ng'hani ng'ombe wako,

24 kwaviya utajili haukala siku zose,

na kombelo hadikala nyelesi zose.

25 Mayani yanyalile yahalimigwa na yamwenga yahota,

mayani kulawa kuna imilima yoiduganya,

26 wanang'hondolo wolava mazoya ya kusonela mawalo,

na uhachuuza luti kwizapata hela ya kugula migunda.

27 Iviya kwizakung'wa maziwa mengi ya luti wamwenga,

kwa ichimu chako na kaye yako na wasang'hani wako wa chike.