1 Muhavu wanhu ngayengaye wokala bila ubananzi,

kufosa wabozi wolonga uvwizi.

2 Havinogile wanhu kuiyoha bila umanyi,

iviya kutausa na kwaga.

3 Ubozi wa wanhu wowagiza wenyewo,

mbali womuwonela ludoko Mndewa Mulungu.

4 Utajili wokongeza wambwiya wa sambi,

mbali ngayengaye wobaguligwa na wambwiya zawo.

5 Wasindila wa uvwizi wezatagusigwa,

na wanhu wolonga uvwizi hawezahonyoka.

6 Wanhu wengi woikombakomba kwa mtawala,

mbali chila munhu ni mbwiya wa munhu yolava chitumetume.

7 Ngayengaye wokwihiligwa na ndugu zawo wose,

na wambwiya zawo wezawabanga.

Ingawa wowasondelela muladi wawapule,

hawapatika kokose.

8 Wanhu wopata ubala woilonda wawo wenyewo,

na wanhu wokwamha umanyi wokala goya.

9 Wasindila wa uvwizi wezatagusigwa,

wanhu wolonga uvwizi wezanangigwa.

10 Wabozi hawalondeka kukala kwa madambwa,

na watumwa hawalondeka ng'hani kuwatawala wenevale.

11 Wanhu wabala hawapata ludoko himahima,

na wanhu wolekelela uhasanyi wotogozigwa.

12 Ludoko lwa wafalume lulinga fana simba viyotongoloma,

mbali unovu wawo ulinga fana nhungwe muna yamayani.

13 Wana wabozi wowaguma chinyala tati zawo,

mbali wanaake weli na ndwagi walinga fana madwende ya mvula hayamala.

14 Kaye na vinhu ni uhazi uyopata munhu kulawa kwa tati yake,

mbali Mndewa Mulungu muhala niiyo yomwing'ha mulume muke mbala.

15 Ubwa wowatenda wanhu wawone nhongo,

na wabwa wezawona nzala.

16 Wanhu wozindilila malagilizo ya Mndewa Mulungu, wezakuwa wagima,

mbali wanhu hawazindilila malagilizo wezadanganika.

17 Wanhu womuwonela ubazi ngayengaye, womwazima Mndewa Mulungu,

nayo Mndewa Mulungu kezawaliha kwa chiya chiwatendile.

18 Mulamule mwanago yang'hali mdodo,

one hutendile ivo, mwana iyo kwizamdanganya.

19 Wanhu wamemile ludoko wezapata nhaguso yawo,

uhawalopola, kolondeka utende ivo kaidi.

20 Tegeleza ndagilizi na utogole mafundizo,

muladi uwe mbala siku zako zose.

21 Wanhu wogesa mbuli nyingi,

mbali chiyoilunga Mndewa Mulungu niicho chondachilawilile.

22 Chinhu chilondeka kwa munhu ni kwaminika.

Muhavu kuwa ngayengaye kufosa kuwa mvwizi.

23 Wanhu womdumba Mndewa Mulungu wezakala siku nyingi,

na wezakwiguta bila kugaya.

24 Wanhu wamwenga wabwa ng'hani mbaka hawadaha kuja wenyewo.

25 Watowe wakewezi muladi wanhu hawavimanyile waifunze kuwa wabala,

wakalikile wanhu wovimanya, nawo wezaifunza.

26 Mwana yoyose yombawila tati yake na kumuwinga mami yake,

koguma chinyala na kogala ubananzi.

27 Mwanangu, one uhaleka kuifunza,

baho kwizazimiza chiya choukalile kuchimanya.

28 Wasindila hawafaya wozeha nhaguso,

milomo ya wanhu wotenda mbuli zihile yomela uvwizi.

29 Nhaguso zisasaligwa kwa ichimu cha wakewezi,

iviya wabozi wezalanhigwa.