1 Mwanangu, uzitogole mbuli zangu,

na uzike goya ndagilizi zangu muna umoyo wako.

2 Tegeleza mbuli za ubala,

na uiyohe kuvimanya.

3 Ulonde kusagula vinhu vinogile,

na upule udahi wa kuvimanya.

4 Uzahile ubala fana viuzahila hela,

iviya fana viuzahila ngama ifisigwe.

5 Kwa kutenda ivo, kwizavimanya kumdumba Mndewa Mulungu,

na kummanya yeye.

6 Kwaviya Mndewa Mulungu kowatenda wanhu wawe na ubala,

kwa mbuli zake, kowatenda wanhu wavimanye na wawe na nzewele.

7 Mulungu kowataza wanhu wotenda mbuli zinogile,

na kowamila wanhu welibule ubananzi.

8 Kwaviya Mulungu kowakaliza goya wanhu wotenda mbuli zinogile,

na kowakaliza goya wanhu wake wokwaminika.

9 Uhanitegeleza, kwizavimanya kutenda mbuli zinogile na zigoloke,

iviya kwizavimanya kuwinza inhululika bila ya kuwonela.

10 Kwaviya muna umoyo wako kwizakuwa na ubala na kwizadeng'helela.

11 Vondausagule vinhu vinogile kwizakala goya,

na umanyi wizakukaliza.

12 Uhawa na ubala hwizatenda mbuli zihile,

na hwizatogola mbuli ziwolonga wavwizi.

13 Wanhu wano woleka kutenda mbuli zinogile,

wogenda muna inzila ili na ziza totolo.

14 Wodeng'helela kutenda mbuli zihile,

na wonogelwa na wihi.

15 Wowavwizila wamwenga,

na wolonga uvwizi.

16 Uhawa mbala kodaha kumkimbila mwanamke malaya,

yowanogeza walume kwa mbuli zake zilimulile.

17 Komuleka mulume yamsolile yang'hali mhambe,

na kodizeha lagano dowekile haulongozi wa Mulungu wake.

18 Uhengila muikaye ya mwanamke malaya kokwaga,

kwaviya nzila yake yohita kuzimu.

19 Wanhu wose wohita kumwake hawabwela,

na hawafika kuna uugima.

20 Usondelele simwe da wanhu wotenda mbuli zinogile,

na ukale fana viwokala wanhu welile.

21 Kwaviya wanhu wotenda mbuli zinogile, wezakala muna iisi yawo,

na wezagendelela kukala uko siku nyingi.

22 Mbali wanhu wotenda mbuli zihile wezabaguligwa na isi yawo,

na wanhu hawaminika wezang'oligwa.