1 Wanhu wotenda mbuli zihile wokimbila ingawa habule munhu yowawinga,

mbali wanhu wotenda mbuli zinogile magalu fana simba.

2 Isi ihawa na tibwilitibwili wolawilila walangulizi wengi,

mbali isi ili na walangulizi wabala izagangamala.

3 Munhu ngayengaye yomwehula munhu ngayengaye ng'hani,

kalinga fana mvula ng'hulu yoidanganya ndiya.

4 Wanhu woyalema malagilizo wowatogola wanhu wotenda mbuli zihile,

mbali wanhu wozindilila malagilizo wowalema wanhu wotenda mbuli zihile.

5 Wanhu wotenda mbuli zihile hawamanyile kuhumiza voilondeka,

mbali wanhu womzahila Mndewa Mulungu wovimanya goya.

6 Muhavu ngayengaye wolonga ukweli,

kufosa matajili wadelenya.

7 Wana wozindilila malagilizo wana nzewele,

mbali wambwiya wa wamelo wowaguma chinyala tati zawo.

8 Wanhu wokongeza utajili wawo kwa limangwe kulu,

mbali wanhu wowawonela ubazi ngayengaye wezapata utajili wa wanhu wawo.

9 One wanhu wahalema kutegeleza malagilizo ya Mulungu,

chiya chiwopula chomwihiza Mulungu.

10 Munhu yowalongoza muna inzila ihile wanhu wotenda mbuli zinogile,

kezakugwa muna dikombo jake mwenyewo,

mbali wanhu welibule ubananzi wezahokela uhazi unogile.

11 Wanhu matajili wogesa kuwa wabala,

mbali ngayengaye weli na umanyi wowamanya wanhu weli na vinhu vingi viweli.

12 Wanhu wotenda mbuli zinogile wahahuma, wanhu wamwenga wosangalala,

mbali wanhu wotenda mbuli zihile wahatawala, wanhu wamwenga wezaifisa.

13 Wanhu woufisa uhasanyi wawo, hawezakala goya,

mbali wanhu wosama uhasanyi wawo na kuleka, wezawoneligwa ubazi.

14 Kamweda munhu ija yomdumba Mndewa Mulungu siku zose,

mbali munhu youtenda moyo wake kuwa mdala kezapata magayo.

15 Munhu mwihi yowatawala ngayengaye,

kalinga fana simba yotongoloma hebu dubu yeli na nzala.

16 Mulangulizi mbozi kowawonela ng'hani wanhu,

mbali munhu halonda kuwabamanya wamwenga kezatawala miyaka mingi.

17 Wanhu wogazigwa na ubananzi wa kukoma munhu,

wezaifisa mbaka siku zawo za kudanganika,

mbali munhu yoyose sekeyawataze.

18 Wanhu wokala voilondeka wezakala goya,

mbali wanhu wavwizi wezanangigwa kwa kusinhukiza.

19 Wanhu wolima migunda yawo wezakuwa na ndiya nyingi,

mbali wanhu wotenda mbuli za chakachaka wezakuwa ngayengaye ng'hani.

20 Wanhu waminika wezatemeligwa mate ng'hani,

mbali wanhu wolonda kupata utajili wa himahima wezatagusigwa.

21 Kuwabagula wanhu hakunogile,

wanhu wezatenda mbuli zihile muladi wapate chihande cha gate.

22 Wanhu wagila womelela mate kupata utajili,

mbali hawavimanyile kuwa ungayengaye wowezila.

23 Wanhu wowazuma wayawo wezatogozigwa,

kufosa wanhu weli na mbuli za kuhembeleza kwa uvwizi.

24 Munhu yombawila tati yake hebu mami yake na kulonga, "Siyo ubananzi,"

iyo koilumba na wasede.

25 Wanhu wagila wokong'hela ndwagi,

mbali wanhu womuhuwila Mndewa Mulungu wezakala goya.

26 Wanhu wohuwila nzewele zawo ni wabozi,

mbali wabala wezakala moyo hole.

27 Wanhu wowagolela ngayengaye hawezahungukilwa na chinhu chochose,

mbali wanhu wowehula ngayengaye wezaduwiligwa ng'hani.

28 Wanhu wotenda mbuli zihile wahatawala, wanhu wamwenga woifisa,

mbali wanhu wotenda mbuli zihile wahaleka kutawala, wanhu wotenda mbuli zinogile wokala goya.