1 Wanhu woibagula wotenda viwolonda wenyewo,

wolema mbuli za ubala.

2 Wabozi hawalonda kuvimanya,

mbali wodeng'helela kulonga magesa yawo.

3 Wanhu wamwenga wowehula waja wotenda mbuli zihile,

wanhu viwotenda mbuli za kuguma chinyala wozehigwa.

4 Mbuli za wabala zilinga fana nzasa za mazi,

na zilinga fana mazi yamemile.

5 Sekeuleme kuwatagusa wanhu wotenda mbuli zihile,

hebu kuwema haki wanhu welibule ubananzi.

6 Mbuli za wanhu wabozi zogala ndwagi,

milomo yawo wenyewo yowahonza walanhigwe.

7 Milomo ya wabozi yowananga,

na mbuli zawo zilinga fana mtego wa kuinamata wenyewo.

8 Mbuli za wadesi zilinga fana ndiya zili mulile,

zokwingila mgati ng'hani mwa lukuli.

9 Wanhu wabwa ni ndugu wa waja wonanga.

10 Mndewa Mulungu kalinga fana mhongono igangamale,

na wanhu wotenda mbuli zinogile wokimbilila kumwake wakakale goya.

11 Vinhu va matajili vilinga fana bululu dili na mhongono,

wogesa vizawakaliza.

12 Wanhu weli na magoda wezanangigwa,

mbali wanhu woinyendanyenda wezahishimigwa.

13 Wanhu wokwidika bila kutegeleza ni wabozi na woguma chinyala.

14 Muhe wa munhu wodaha kuufunyila umoyo utamu,

mbali habule munhu yodaha kuufunyila umoyo ihawa moyo wake ulumizigwa.

15 Wanhu weli na nzewele wolonda kuifunza,

na wanhu wabala wozahila umanyi.

16 Uhalonda kuiting'hana na munhu mkulu, umgalile chitumetume.

17 Munhu yokwandusa kuigombela kowoneka kabule ubananzi,

mbaka yeze munhu iyagombile nayo yamuuze.

18 Mhiya yokomeleza kuibishila,

na yowalamula wanhu waidi weli na nguvu wogomba.

19 Vidala kuilumba na mbwiya youmbanange kufosa kutula mhongono,

iviya kuibishila kulinga fana nyivi za mhongono zili na mhalalingwe.

20 Zinda za wanhu zokwiguta mbuli zilawa muna imilomo yawo,

wezakwiguta mbuli ziwolonga.

21 Lulimi lodaha kugala ifa hebu ugima,

waja wolusang'hanila wezakuja matunda yake.

22 Munhu yopata muke kopata chinhu chinogile,

nayo kotogoligwa na Mndewa Mulungu.

23 Ngayengaye kopula yawoneligwe ubazi,

mbali tajili kokwidika kwa kukalika.

24 Wambwiya wengi wodaha kumbananga miyawo,

mbali kuna mbwiya yoilumba na munhu kufosa ndugu.